പന്നിക്കുഞ്ഞുങ്ങളെ നാട്ടുകാർ പിടികൂടി വനപാലകർക്ക് കൈമാറി

മുണ്ടപ്പള്ളി∙ പ്ലാക്കാട്ട് ഏലായിൽ കണ്ട പന്നിക്കുഞ്ഞുങ്ങളെ നാട്ടുകാർ പിടികൂടി വനപാലകർക്കു കൈമാറി. അഞ്ചു പന്നിക്കുഞ്ഞുങ്ങളെയാണ് നാട്ടുകാർ പ്ലാക്കാട്ട് ഏലായിൽ കണ്ടത്. തുടർന്ന് ഇതിനെ നാട്ടുകാർ പിടികൂടിയ ശേഷം കോന്നിയിലുള്ള വനപാലകരെ വിവരമറിയിച്ചു. അവിടെ നിന്ന് വൈകിട്ടോടെ വനപാലകർ കൂടുമായി എത്തി കൊണ്ടുപോയി. 

മുണ്ടപ്പള്ളി പ്രദേശത്ത് കാട്ടുപന്നികളുടെ ശല്യം രൂക്ഷമാണ്. പ്ലാക്കാട് ഏലാ ഉൾപ്പെടെയുള്ള ഏലാകളിൽ പന്നികളുടെ ശല്യം കാരണം കൃഷി ചെയ്യാൻ പറ്റാത്ത അവസ്ഥയിലാണ്. പ്ലാക്കാട്ട് ഏലായിലാണ് ഇവയുടെ ശല്യം ഏറ്റവും കൂടുതലുള്ളത്.