കൃഷിയിറക്കി, വളമിട്ട് വളർത്താൻ കർഷകർ; ഉഴുതെടുക്കാൻ പന്നി

പെരുമ്പെട്ടി∙ കാട്ടുപന്നിയുടെ കടന്നുകയറ്റത്തിൽ കൃഷിനശിച്ചു. കഴിഞ്ഞ രാത്രിയിറങ്ങിയ പന്നിക്കൂട്ടം വെട്ടുവേലിൽ വിനോദിന്റെ പുരയിടത്തിലെ വാഴക്കൃഷിയാണു നാശോന്മുഖമാക്കിയത്. വാഴകൾ കടിച്ചരച്ച നിലയിലാണ്. സമീപ പുരയിടങ്ങളിലെ റബറിനും നാശംവിതച്ചിട്ടുണ്ട്. പുരയിടമാകെ ഉഴുതുമറിച്ച നിലയിലാണ്. തൊടിയിലെ കാട്ടുകൽ നിർമിത കയ്യാലകൾ കുത്തിമറിച്ചിട്ടുണ്ട്.

ഇന്നലെ വെളുപ്പിന് ചുങ്കപ്പാറ - ചാലാപ്പള്ളി റോഡിൽ മാരംകുളത്തിന് സമീപം ഓഡിറ്റോറിയംപടിയിൽ പ്രഭാത സവാരിക്കാരുടെ മുൻപിലായി കാട്ടുപന്നിക്കുട്ടം റോഡുമുറിച്ചുകടന്ന് മറുവശത്തെ പുരയിടത്തിലേക്ക് ചാടി. അത്യാൽ സ്കൂൾ വളവിൽ ഇരുചക്രവാഹനയാത്രികർ പന്നിയുടെ ആക്രമണത്തിൽ നിന്ന് തലനാരിഴയ്ക്കാണ് രക്ഷപ്പെട്ടത്. മേഖലയിൽ മുള്ളൻപന്നിയുടെ കടന്നുവരവും അനുദിനം വർധിക്കുകയാണ്.