വ്യാപക കൃഷിനാശം, മതിൽ ഇടിഞ്ഞ് വീണു, വീട്ടിൽ വെള്ളം കയറി
Mail This Article
വ്യാപക കൃഷിനാശം
ഇരിങ്ങാലക്കുട ∙ മുരിയാട് പഞ്ചായത്തിലെ പൊട്ടുച്ചിറ പാടശേഖരത്തിലെ 35 ഏക്കറിലും ഉൗരോത്ത് പാടത്തെ 15 എക്കറിലും വെള്ളം കയറി. നടീലിന് തയാറായ ഞാറാണ് നശിച്ചത്. വേളൂക്കര പഞ്ചായത്തിലെ വട്ടത്തിച്ചിറ, പൊയ്യച്ചിറ പാടശേഖരങ്ങളിലും വെള്ളം കയറി. മുരിയാട് കായലിലെ മാടായിക്കോണം തെക്കേ കോൾ പാടശേഖരത്തിലെ 350 ഏക്കറോളം വരുന്ന പടവുകളിലെ മിക്കയിടത്തും വെള്ളം കയറി. ദിവസങ്ങളോളം മോട്ടർ അടിച്ച് വെള്ളം കളഞ്ഞ് നിലം ഒരുക്കിയാണ് ഇവിടെ വിത്തിട്ടത്. ഇനി 20 ദിവസമെങ്കിലും മോട്ടർ അടിച്ചാൽ മാത്രമേ വെള്ളം വറ്റിക്കാൻ കഴിയൂ എന്നു കർഷകർ പറഞ്ഞു.
വീട്ടിൽ വെള്ളം കയറി
വെള്ളാങ്ങല്ലൂർ ∙ ഇന്നലെ പെയ്ത മഴയിൽ പഞ്ചായത്തിലെ കോണത്തുകുന്ന് എൻഎസ്എസ് സ്കൂളിന് സമീപം വാഴവളപ്പിൽ രവിയുടെ വീട്ടിൽ വെള്ളം കയറി. രവിയും കുടുംബവും ബന്ധു വീട്ടിലേക്ക് മാറി.
മതിൽ ഇടിഞ്ഞ് വീണു
വെള്ളാങ്ങല്ലൂർ ∙ ഇന്നലെ പെയ്ത മഴയിൽ കോണത്തുകുന്ന് യുപി സ്കൂളിന്റെ മതിൽ ഇടിഞ്ഞു വീണു. മരത്തിന്റെ വേര് മതിലിന്റെ അടിയിലേക്ക് ഇറങ്ങിയതാണ് തകർച്ചയ്ക്ക് കാരണമെന്നു സ്കൂൾ വികസന സമിതി ഭാരവാഹികൾ പറഞ്ഞു. നേരത്തെ ഈ ഭാഗത്ത് വിള്ളൽ കണ്ടിരുന്നു.