എടിഎം കൗണ്ടറിൽ എത്തിയ യുവാവ് കണ്ടതു പുല്ലാനി മൂർഖനെ; പണമല്ല, പണി കിട്ടിയേനെ !

കയ്പമംഗലം ∙ കാളമുറിയിലെ ബാങ്കിന്റെ എടിഎം കൗണ്ടറിൽ പണമെടുക്കാനെത്തിയ യുവാവ് കണ്ടതു പുല്ലാനി മൂർഖനെ. എടിഎം യന്ത്രത്തിനു പിന്നിൽനിന്നു പുറത്തേക്കു തല നീട്ടുകയായിരുന്നു നാലടിയോളമുള്ള പാമ്പ്. തിങ്കൾ രാത്രി പത്തരയോടെയാണു സംഭവം.

പൊലീസിൽ അറിയിച്ചതിനെ തുടർന്നു വന്യജീവി സംരക്ഷകൻ ഹരി മതിലകത്തെ വിളിച്ചുവരുത്തിയാണു പാമ്പിനെ പിടികൂടിയത്. പിന്നീടിതിനെ കാട്ടിൽ വിട്ടു. പണമെടുക്കാൻ കയറിയ ആരോ തുറന്നിട്ട വാതിലിലൂടെ ഉള്ളിലെത്തിയതാകാം പാമ്പെന്നു കരുതുന്നു.