കാപ്പ ചുമത്തി ഗുണ്ടാ നേതാവ് പല്ലൻ ഷൈജുവിനെ നാടുകടത്തി

കൊടകര ∙ സംസ്ഥാനത്തിനകത്തും പുറത്തും കൊലപാതകം, കൊലപാതകശ്രമം അടക്കം ഒട്ടേറെ കേസുകളിൽ പ്രതിയായ പന്തല്ലൂർ മച്ചിങ്ങൽ ഷൈജുവിനെ (പല്ലൻ ഷൈജു –43) കാപ്പ ചുമത്തി നാടുകടത്തിയതായി പൊലീസ് അറിയിച്ചു. ജില്ലയിൽ പ്രവേശിക്കുന്നതു സാമൂഹിക വിരുദ്ധ പ്രവർത്തനങ്ങൾ തടയൽ നിയമപ്രകാരം തടഞ്ഞു.

കൊടകര, തൃശൂർ ഈസ്റ്റ്, വെസ്റ്റ്, നെടുപുഴ, എറണാകുളം ചെങ്ങമനാട്, സുൽത്താൻ ബത്തേരി, തമിഴ്നാട്ടിലെ ഗുണ്ടൽപ്പേട്ട് എന്നീ പൊലീസ് സ്റ്റേഷനുകളിലും ഇരിങ്ങാലക്കുട എക്സൈസ് റേഞ്ച് ഓഫിസിലും ഷൈജുവിനെതിരെ കേസുകളുണ്ട്. തൃശൂർ കേന്ദ്രീകരിച്ചുള്ള ക്വട്ടേഷൻ ഗുണ്ട സംഘ നേതാവായിരുന്ന പല്ലൻ ഷൈജു, കുഴൽപണം തട്ടുന്ന സംഘ നേതാവുകൂടിയായതോടെ വർഷങ്ങൾക്കു മുൻപാണ്  തൃശൂരിൽ നിന്നു പന്തല്ലൂരിലേക്കു താമസം മാറ്റിയത്.