റിപ്പബ്ലിക് ദിന ചടങ്ങ്: ശ്യാമിലിക്കു കേന്ദ്ര സർക്കാരിന്റെ ക്ഷണം
Mail This Article
ചാലക്കുടി ∙ഡൽഹിയിലെ റിപ്പബ്ലിക് ദിന ചടങ്ങിൽ പങ്കുചേരാൻ കുട്ടിപ്പൊലീസുകാരി ശ്യാമിലിക്കു കേന്ദ്ര സർക്കാരിന്റെ ക്ഷണം ലഭിച്ചു. മാരാങ്കോട് ആദിവാസി ഊരുനിവാസിയായ ശ്യാമിലി ചായ്പൻകുഴി ഗവ. ഹൈസ്കൂളിലെ പത്താം ക്ലാസ് വിദ്യാർഥിനിയും ഊരുമൂപ്പൻ പള്ളിതറവാട്ടുകാരൻ സതീഷിന്റെയും സരിതയുടെയും രണ്ടാമത്തെ മകളുമാണ്.ജില്ലയിലെ 59 ആദിവാസി ഊരുകളിൽ ആകെ ക്ഷണം ലഭിച്ചതു ശ്യാമിലിക്കു മാത്രമാണ്.
ഇന്ന് 12ന് എറണാകുളത്ത് എത്താനാണ് അധികൃതരുടെ നിർദേശം. എട്ടാം ക്ലാസ് മുതൽ സ്‌കൂളിലെ സ്റ്റുഡന്റ്‌സ് പൊലീസ് കെഡറ്റ് കൂടിയാണ് ശ്യാമിലി. എസ്പിസിയുടെ പ്രവർത്തനങ്ങൾ വിലയിരുത്തിയാണ് റിപ്പബ്ലിക് ദിന പരിപാടിയിലേക്ക് ക്ഷണം ലഭിച്ചത്. പഠനത്തിലും ചിത്രരചനയിലും മിടുക്കിയായ ശ്യാമിലിക്കു ഡൽഹിയിൽ പരേഡ് കാണ‌ാൻ അവസരം ലഭിച്ചതിലുള്ള ആഹ്ലാദത്തിലാണു വീട്ടുകാരും നാട്ടുകാരും.അത്യപൂർവമായി ലഭിക്കുന്ന സൗഭാഗ്യത്തിന് എല്ലാവരോടും നന്ദിയുണ്ടെന്ന് ഊരുമൂപ്പൻ സതീഷ് പറഞ്ഞു.
