ചുരത്തിൽ ലോറി കൊക്കയിലേക്ക് മറിഞ്ഞ് രണ്ടു പേർക്കു പരുക്ക്

താമരശ്ശേരി∙ ആന്ധ്രയിൽ നിന്നു കോഴിക്കോട്ടേക്ക് അരി കയറ്റി വരികയായിരുന്ന ലോറി ചുരത്തിലെ 6ാം വളവിൽ നിയന്ത്രണം വിട്ടു കൊക്കയിലേക്കു കൂപ്പുകുത്തി. 50 അടിയോളം താഴ്ചയിലേക്കു മറിഞ്ഞ ലോറിയിൽ ഉണ്ടായിരുന്ന ആന്ധ്ര നെല്ലൂർ സ്വദേശികളായ ഡ്രൈവർ രവി(54), ക്ലീനർ അലി ഭായി (42) എന്നിവർക്കു സാരമായി പരുക്കേറ്റു.

ഇവരെ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.വ്യാഴാഴ്ച രാത്രി 11.10നാണ് അപകടം. ലോറി മരത്തിൽ തട്ടി കൂടുതൽ താഴ്ചയിലേക്കു പോവാതിരുന്നതു വലിയ ദുരന്തം ഒഴിവാക്കി. താമരശ്ശേരി പൊലീസും ചുരം സംരക്ഷണ സമിതി പ്രവർത്തകരും യാത്രക്കാരുമാണ് രക്ഷാ പ്രവർത്തനം നടത്തിയത്. കയറു കെട്ടിയാണ് ഇരുവരെയും റോഡിൽ എത്തിച്ചത്. അരിയും ലോറിയും ഇന്നലെ രാത്രി വരെയും കരയ്ക്കെത്തിക്കാൻ കഴിഞ്ഞിട്ടില്ല.