വീട് തകർന്നു വീണു; വയോധികരായ സ്ത്രീകൾ തലനാരിഴയ്ക്ക് രക്ഷപെട്ടു

ബത്തേരി ∙ മാടക്കരയിൽ വയോധികരായ 2 സ്ത്രീകൾ മാത്രം താമസിക്കുന്ന വീട് തകർന്നു വീണു. അടുക്കള ഭാഗത്തു നിൽക്കുന്ന ഇരുവരും തലനാരിഴയ്ക്കാണു രക്ഷപ്പെട്ടത്. സഹോദരിമാരായ മാടക്കര വീട്ടിൽ മാളു(74), ശാരദ(65) എന്നിവരുടെ വീടാണു തകർന്നത്. മഴ പെയ്യുന്നതിനിടെ കഴിഞ്ഞ വൈകിട്ട് 6നു മേൽക്കൂരയും ചില ഭിത്തികളും മുഴുവനായും താഴേക്കു പതിക്കുകയായിരുന്നു. 

വീഴാതിരുന്ന പിറകുവശത്തെ ഭിത്തിയോട് ചേർന്ന് അടുക്കള ഭാഗത്തായിരുന്നു മാളുവും ശാരദയും. അതുകൊണ്ടാണ് ഇരുവരും പരുക്കേൽക്കാതെ രക്ഷപ്പെട്ടത്. സമീപത്തായി ബന്ധുക്കളുടെയും മറ്റും സഹായത്താൽ പുതിയ വീടു നിർമിക്കുന്നുണ്ടെങ്കിലും പൂർത്തിയായിട്ടില്ല.