കാറ്റിലും മഴയിലും പറളിക്കുന്ന് പ്രദേശത്ത് വ്യാപക നാശം

കണിയാമ്പറ്റ ∙ കമ്പളക്കാട് പറളിക്കുന്ന് പ്രദേശത്ത് കഴിഞ്ഞ ദിവസമുണ്ടായ ശക്തമായ കാറ്റിലും മഴയിലും വ്യാപക നാശനഷ്ടം. ഒട്ടേറെ കർഷകരുടെ വാഴ, തെങ്ങ്, കമുക് ഉൾപ്പെടെ ഏക്കർ കണക്കിനു കൃഷികൾ നശിച്ചു. കൂടാതെ വീടുകൾക്കും കേടുപാടുകൾ സംഭവിച്ചു. മണ്ണൻകണ്ടി സലീമിന്റെ വീടിന്റെ മുകളിലേക്കു വലിയ അമ്പഴങ്ങ മരം കടപുഴകി വീണ് അടുക്കള ഭാഗം തകർന്നു.

കൂടാതെ വീടിന്റെ പല ഭാഗത്തും വിള്ളലുകളും വീണു.കാറ്റിൽ മരങ്ങൾ വീണ് ലൈനുകൾ പൊട്ടിയതിനാൽ പ്രദേശത്ത് വൈദ്യുതി തടസ്സപ്പെട്ടു. പ്രകൃതിക്ഷോഭം മൂലം കൃഷി നശിച്ചവർക്കും വീടുകൾക്ക് കേടുപാടുകൾ സംഭവിച്ചവർക്കും അടിയന്തര സഹായമെത്തിക്കാനുള്ള നടപടി സ്വീകരിക്കണമെന്ന ആവശ്യം ശക്തമാണ്.