തരുവണ നഗരത്തിൽ അപകടഭീഷണിയായി 3 തണൽമരങ്ങൾ

തരുവണ ∙ ടൗണിലെ മരങ്ങൾ ഭീഷണിയാകുന്നതായി പരാതി. 3 മരങ്ങളാണ് ടൗണിന്റെ ഒത്ത നടുവിലായി സ്ഥിതി ചെയ്യുന്നത്. ബസ് കാത്തു നിൽക്കുന്നവർക്കും ടൗണിൽ എത്തുന്ന വാഹനങ്ങൾക്കും യാത്രക്കാർക്കും ഇവ വൻ ഭീഷണിയാകുന്നതായി നാട്ടുകാർ പറയുന്നു.

കാറ്റിലും മഴയിലും ശിഖരങ്ങൾ പൊട്ടി വീഴുന്നത് അപകടങ്ങൾക്കിടയാക്കുന്നു. ടൗണിന്റെ പല ഭാഗങ്ങളിലായി സ്ഥിതി ചെയ്തിരുന്ന മരങ്ങളിൽ പലതും ടൗൺ വികസനത്തിന്റെ ഭാഗമായി മുറിച്ചു മാറ്റിയിരുന്നു. അവയിൽ ശേഷിക്കുന്നതാണ് ഈ മരങ്ങൾ. നിലവിൽ ഈ മരങ്ങളിൽ പരസ്യ ബാനറുകളും പോസ്റ്ററുകളും‍ നിറഞ്ഞ അവസ്ഥയുമുണ്ട്. മഴക്കാലത്തിനു മുന്നോടിയായി മരങ്ങൾ കാരണം ഉണ്ടാകുന്ന അപകടാവസ്ഥ ഒഴിവാക്കാൻ നടപടിയുണ്ടാകണമെന്നാണു നാട്ടുകാരുടെ ആവശ്യം.‍