കാവുംമന്ദത്ത് ശുദ്ധജല പൈപ്പ് പൊട്ടൽ പതിവ്

കാവുംമന്ദം ∙ എച്ച്എസ് ടൗൺ ഭാഗത്ത് കുടിവെള്ള വിതരണ പൈപ്പ് പൊട്ടുന്നതു പതിവാകുന്നു. പ്രദേശത്തെ പല ഭാഗങ്ങളിലും കുടിവെള്ള വിതരണം മുടങ്ങുകയാണ്. മിക്ക വീടുകളിലും കിണറുകൾ വറ്റിയതോടെ ജല അതോറിറ്റിയുടെ കുടിവെള്ള വിതരണ പദ്ധതികളാണു മിക്ക കുടുംബങ്ങളുടെയും ആശ്രയം. പൈപ്പ് പൊട്ടി വെള്ളം പാഴാകുന്നതിനാൽ പല ഭാഗങ്ങളിലും വെള്ളം എത്താത്ത അവസ്ഥയായി. അതോടെ മിക്ക ദിവസങ്ങളിലും കുടിവെള്ള വിതരണം മുടങ്ങുകയും കുടുംബങ്ങൾ വൻ ദുരിതത്തിലാകുകയും ചെയ്യുന്നു. പൈപ്പ് പൊട്ടി കുടിവെള്ള വിതരണം മുടങ്ങുന്നതു പതിവായതോടെ പ്രശ്നത്തിനു ശാശ്വത പരിഹാരം വേണമെന്നാണ് നാട്ടുകാരുടെ ആവശ്യം.