ആശ്വാസമായി ജില്ലയിൽ വേനൽ മഴ

നടവയൽ ∙ വെന്തുരുകിയ മണ്ണിൽ ആശ്വാസം പകർന്നു വേനൽ മഴ. ജില്ലയിലെ ചിലയിടങ്ങളിൽ ഇന്നലെ വൈകിട്ട് അഞ്ചരയോടെ നിനച്ചിരിക്കാതെ എത്തിയ വേനൽമഴ ആശ്വാസമായി. ഗ്രാമീണ മേഖലയായ നടവയൽ ടൗൺ, പള്ളിത്താഴെ, ചിറ്റാലൂർക്കുന്ന്, പുളിക്കൽ കവല, കായക്കുന്ന്, പൂതാടി, കേണിച്ചിറ അടക്കമുള്ള പ്രദേശങ്ങളിൽ സാമാന്യം നല്ല രീതിയിൽ തന്നെ മഴ ലഭിച്ചപ്പോൾ ബത്തേരി, പനമരം അടക്കമുള്ള പ്രദേശങ്ങളിൽ ചെറിയ തോതിൽ ചാറുക മാത്രമാണുണ്ടായത്. വരും ദിവസങ്ങളിലും മഴ തുടർന്നാൽ കരിഞ്ഞുണങ്ങിത്തുടങ്ങിയതെല്ലാം തലയുയർത്താൻ തുടങ്ങും. തുടർ മഴ ലഭിച്ചാൽ കൃഷികൾക്കും ക്ഷീരകർഷകർക്കും ഗുണകരമാകും. മഴ പെയ്ത സ്ഥലങ്ങളിൽ കടുത്ത ചൂടിന് അൽപം ആശ്വാസമായിട്ടുണ്ട്.