അടുത്തവർഷം 10 ലക്ഷം കുട്ടികൾക്ക് സൗജന്യ യൂണിഫോം

അടുത്ത അധ്യയനവർഷം 10 ലക്ഷം വിദ്യാർഥികൾക്കു സൗജന്യ കൈത്തറി സ്‌കൂൾ യൂണിഫോം തുണി വിതരണം ചെയ്യാൻ സർക്കാർ തീരുമാനിച്ചു. ഉൽപാദനം കൈത്തറി സംഘങ്ങളിൽ തുടങ്ങി. മേയ് 15നു മുൻപു വിതരണം പൂർത്തിയാക്കും. മന്ത്രിമാരായ ഇ.പി.ജയരാജൻ, സി.കെ.രവീന്ദ്രനാഥ് എന്നിവരുടെ സാന്നിധ്യത്തിൽ ചേർന്ന യോഗത്തിലാണു തീരുമാനം.

സർക്കാർ സ്‌കൂളുകളിൽ 1 മുതൽ 7 വരെയും എയ്ഡഡ് സ്‌കൂളുകളിൽ 1 മുതൽ 4 വരെയുമുള്ള 8.45 ലക്ഷം കുട്ടികൾക്കും ഇതേ ക്ലാസുകളിൽ പുതുതായി എത്തുന്ന 1.25 ലക്ഷത്തോളം കുട്ടികൾക്കുമാണു യൂണിഫോം നൽകുക. 48.75 ലക്ഷം മീറ്റർ തുണി വേണം. 122 കോടി രൂപ ചെലവു വരും.

കൈത്തറി സംഘങ്ങൾ 5.80 ലക്ഷം മീറ്റർ തുണി ഉൽപാദിപ്പിച്ചു. കളർ വിവരങ്ങൾ സെപ്റ്റംബർ 15നകം വിദ്യാഭ്യാസ വകുപ്പ് നൽകും. വടക്കൻ ജില്ലകളിൽ ഹാൻവീവും തെക്കൻ ജില്ലകളിൽ ഹാൻടെക്‌സുമാണു കൈത്തറി സംഘങ്ങളിൽനിന്നു യൂണിഫോം ശേഖരിച്ചു വിതരണം ചെയ്യുന്നത്.