സിപെറ്റിൽ പ്ലാസ്‌റ്റിക്‌സ് എൻജിനീയറിങ് പരിശീലനം

ചിലയിനം പ്ലാസ്റ്റിക്കിന്റെ ഉപയോഗം സർക്കാർ തടഞ്ഞിട്ടുണ്ടെങ്കിലും, പല തരത്തിലുമുള്ള പ്ലാസ്‌റ്റിക്കിന്റെ ഗണ്യമായ ഉപയോഗം വ്യവസായരംഗത്തും ഗാർഹിക മേഖലയിലും തുടരും. ഈ സാഹചര്യത്തിൽ പ്ലാസ്‌റ്റിക്‌സിലെ സാങ്കേതിക പരിശീലനം മികച്ച തൊഴിൽസാധ്യത വാഗ്‌ദാനം ചെയ്യുന്നു. ഈ മേഖലയിൽ ഇന്ത്യയിലെ മുൻനിര സ്‌ഥാപനമാണ് കേന്ദ്ര കെമിക്കൽ–രാസവള മന്ത്രാലയത്തിന്റെ നിയന്ത്രണത്തിൽ ചെന്നൈ ആസ്‌ഥാനമായി വിവിധ സംസ്‌ഥാനങ്ങളിലെ 37 കേന്ദ്രങ്ങളിൽ പ്രവർത്തിക്കുന്ന സിപെറ്റ്. CIPET (Central Institute of Plastics Engineering & Technology), TVK Industrial Estate, Guindy, Chennai - 600032; ഫോൺ: 044 – 22254780  / 18004251455; ഇ–മെയിൽ: cipetdgoffice@gmail.com; വെബ്: eadmission.cipet.gov.in & cipet.gov.in.

സിപെറ്റിലെ ഏതാനും കോഴ്‌സുകളിലേക്കുള്ള പ്രവേശനത്തിന് മേയ് 22 വരെ ഓൺലൈനായി അപേക്ഷിക്കാം. കംപ്യൂട്ടർ അധിഷ്ഠിത ജോയിന്റ് എൻട്രൻസ് പരീക്ഷ മേയ് 31ന് തിരുവനന്തപുരവും കൊച്ചിയും അടക്കം 42‌ കേന്ദ്രങ്ങളിൽ. ക്ലാസുകൾ ജൂലൈ ഒന്നിനു തുടങ്ങും. 

ഇപ്പോൾ അപേക്ഷിക്കാവുന്ന കോഴ്സുകൾ

1. ഡിപ്ലോമ: പ്ലാസ്‌റ്റിക്‌സ് ടെക്‌നോളജി / പ്ലാസ്‌റ്റിക്‌സ് മോൾഡ് ടെക്‌നോളജി -  എസ്എസ്എൽസിക്കാർക്ക്.  

2. പിജി ഡിപ്ലോമ: പ്ലാസ്‌റ്റിക്‌സ് പ്രോസസിങ് & ടെസ്‌റ്റിങ്, സയൻസ് ബിരുദമുള്ളവർക്ക്

3. പോസ്‌റ്റ് ഡിപ്ലോമ ഇൻ പ്ലാസ്‌റ്റിക്‌സ് മോൾഡ് ഡിസൈൻ (കാഡ്–കാം): പ്രവേശനത്തിന് മെക്കാനിക്കൽ, പ്ലാസ്റ്റിക്സ്, പോളിമർ, ടൂൾ, പ്രൊഡക്‌ഷൻ, മെക്കട്രോണിക്സ്, ഓട്ടോ, ടൂൾ & ഡൈ, പെട്രോകെമിക്കൽസ്, ഇൻഡസ്ട്രിയൽ, ഇൻസ്ട്രുമെന്റേഷൻ ഇവയൊന്നിലെ ത്രിവത്സര ഡിപ്ലോമ അഥവാ സിപെറ്റിലെ ഡിപിഎംടി / ഡിപിടി വേണം.   

ഓരോ സ്ഥാപനത്തിലെയും കോഴ്സ്‌ വിവരങ്ങൾക്കും അപേക്ഷാരീതിക്കും സൈറ്റുകൾ നോക്കാം. സിപെറ്റിൽ ഇവയ്ക്കു പുറമേ വിവിധ യുജി, പിജി, പിഎച്ച്ഡി പ്രോഗ്രാമുകളുമുണ്ട്.

കൊച്ചി കേന്ദ്രത്തിന്റെ വിലാസം: CIPET,  HIL Colony, Edayar Road, Pathalam, Eloor, Udyogamandal - 683501; ഫോൺ: 0484-2547741, ഇ–മെയിൽ: cipetkochi@gmail.com.