കോച്ചിങ് സെന്റർ പരസ്യങ്ങളിൽ അവകാശവാദങ്ങൾ പാടില്ല
Mail This Article
ന്യൂഡൽഹി ∙ കോച്ചിങ് സെന്ററുകളുടെ പരസ്യങ്ങളിൽ ‘100% ജോലി/സിലക്ഷൻ ഉറപ്പ്’ എന്ന മട്ടിലുള്ള അവകാശവാദങ്ങൾ പാടില്ലെന്ന് കേന്ദ്ര ഉപഭോക്തൃ സംരക്ഷണ അതോറിറ്റിയുടെ (സിസിപിഎ) കരടു മാർഗരേഖ വ്യക്തമാക്കി. സിസിപിഎയുടെ പ്രത്യേക സമിതിയെയാണു പരീക്ഷ/തൊഴിൽ കോച്ചിങ് സെന്ററുകൾക്ക് മാർഗരേഖ തയാറാക്കാൻ ചുമതലപ്പെടുത്തിയിരുന്നത്.
പ്രവേശനപരീക്ഷകളിലെ വിജയികളുടെ ചിത്രങ്ങൾ പരസ്യത്തിൽ ഉപയോഗിക്കാറുണ്ട്. ഇനി ഇത്തരം ചിത്രങ്ങൾക്കൊപ്പം വിജയിയുടെ റാങ്ക്, തിരഞ്ഞെടുത്ത കോഴ്സ്, ദൈർഘ്യം, കോഴ്സിന് ഫീസ് ഉണ്ടായിരുന്നോ എന്നതടക്കം നൽകണം. പരസ്യത്തിൽ അവകാശവാദങ്ങളുടെ അതേ വലുപ്പത്തിൽ നിബന്ധനകളും നൽകണം. തെറ്റിദ്ധരിപ്പിക്കുന്ന പരസ്യങ്ങൾ നൽകിയതിനു രാജ്യത്തെ 20 സിവിൽ സർവീസ് പരിശീലന സ്ഥാപനങ്ങൾക്കെതിരെ കേന്ദ്ര ഉപഭോക്തൃ സംരക്ഷണ അതോറിറ്റി (സിസിപിഎ) ഒക്ടോബറിൽ അന്വേഷണം പ്രഖ്യാപിച്ചിരുന്നു.