ഐബിയിൽ 2000 ഇന്റലിജൻസ് ഓഫിസർ,ശമ്പളം: 44,900–1,42,400 രൂപ
Mail This Article
കേന്ദ്ര ആഭ്യന്തര മന്ത്രാലയത്തിനു കീഴിലെ ഇന്റലിജൻസ് ബ്യൂറോയിൽ അസിസ്റ്റന്റ് സെൻട്രൽ ഇന്റലിജൻസ് ഓഫിസർ ഗ്രേഡ്–II / എക്സിക്യൂട്ടീവ് തസ്തികയിലെ 2000 ഒഴിവുകളിലേക്ക് അപേക്ഷ ക്ഷണിച്ചു. അസിസ്റ്റന്റ് സെൻട്രൽ ഇന്റലിജൻസ് ഓഫിസർ ഗ്രേഡ് II /എക്സിക്യൂട്ടീവ് എക്സാമിനേഷൻ 2020 മുഖേനയാണ് തിരഞ്ഞെടുപ്പ്. ജനുവരി 9 വരെ ഒാൺലൈനായി അപേക്ഷിക്കാം. ഗ്രൂപ്പ് സി നോൺ ഗസറ്റഡ്, നോൺ മിനിസ്റ്റീരിയൽ തസ്തികയാണ്. നേരിട്ടുള്ള നിയമനമാണ്. ഭിന്നശേഷിക്കാർ അപേക്ഷിക്കേണ്ടതില്ല.
ഒഴിവ്: 2000 (ജനറൽ– 989, ഇഡബ്ല്യുഎസ്–113, ഒബിസി– 417, എസ്സി– 360, എസ്ടി– 121).
യോഗ്യത: ബിരുദം/ തത്തുല്യം, കംപ്യൂട്ടർ പരിജ്ഞാനം അഭിലഷണീയം.
പ്രായം: 18–27 വയസ്. അപേക്ഷ സ്വീകരിക്കുന്ന അവസാന തീയതി അടിസ്ഥാനമാക്കി പ്രായം കണക്കാക്കും. ഉയർന്ന പ്രായത്തിൽ എസ്സി/ എസ്ടി വിഭാഗക്കാർക്ക് അഞ്ചും ഒബിസിക്ക് മൂന്നും വർഷം ഇളവു ലഭിക്കും. മറ്റു യോഗ്യരായവർക്കും നിയമാനുസൃത ഇളവ് ലഭിക്കും.
ശമ്പളം: ലെവൽ 7, (44,900–1,42,400 രൂപ).
തിരഞ്ഞെടുപ്പ് രീതി: എഴുത്തു പരീക്ഷ (ടയർ-I, ടയർ-II), ഇന്റർവ്യൂ (ടയർ III) എന്നിവയുടെ അടിസ്ഥാനത്തിലാണ് തിരഞ്ഞെടുപ്പ്. കേരളത്തിൽ എറണാകുളം, കണ്ണൂർ, കൊല്ലം, കോട്ടയം, കോഴിക്കോട്, തിരുവനന്തപുരം, തൃശൂർ എന്നിവിടങ്ങളിൽ പരീക്ഷാകേന്ദ്രങ്ങളുണ്ട്. ടയർ-I ഒബ്ജക്ടീവും ടയർ-II ഡിസ്ക്രിപ്റ്റീവ് രീതിയിലുമുള്ള പരീക്ഷയാണ്. ടയർ-I പരീക്ഷയിൽ ജനറൽ അവയർനസ്, ക്വാണ്ടിറ്റേറ്റീവ് ആപ്റ്റിറ്റ്യൂഡ്, ന്യൂമറിക്കൽ/ അനലിറ്റിക്കൽ/ ലോജിക്കൽ എബിലിറ്റി ആൻഡ് റീസണിങ്, ഇംഗ്ലിഷ് ലാംഗ്വേജ്, ജനറൽ സ്റ്റഡീസ് എന്നിവയെ അധികരിച്ചു ചോദ്യങ്ങളുണ്ടാവും.
അപേക്ഷാഫീസ്: 600 രൂപ (പരീക്ഷാഫീസ് 100 രൂപയും റിക്രൂട്മെന്റ് പ്രോസസിങ് ചാർജ് 500 രൂപയും). പട്ടികവിഭാഗക്കാർക്കും വനിതകൾക്കും വിമുക്തഭടന്മാർക്കും റിക്രൂട്മെന്റ് പ്രോസസിങ് ചാർജായ 500 രൂപ മതി. ഒാൺലൈനായും ഒാഫ്ലൈനായും ഫീസടയ്ക്കാം. ജനുവരി 9 ന് മുൻപായി ഒാൺലൈനായി ഫീസടയ്ക്കണം. എസ്ബിഐ ചെലാൻ വഴി ഫീസടയ്ക്കുന്നവർ ജനുവരി 9 ന് അകം ചെലാൻ ജനറേറ്റ് ചെയ്യണം. www.mha.gov.in,
www.ncs.gov.in
English Summary: Intelligence Officer Recruitment