എൻജിനീയറിങ്, എംഎസ്‌‌സി യോഗ്യതകളുണ്ടോ?, ഇഎസ്ഇ എഴുതി കേന്ദ്ര സർവീസിൽ ജോലിനേടാം; 327 ഒഴിവുകൾ

എൻജിനീയറിങ് ബിരുദധാരികൾക്ക് കേന്ദ്ര സർക്കാരിലും പൊതുമേഖലാ സ്‌ഥാപനങ്ങളിലും നിയമനത്തിനുള്ള എൻജിനീയറിങ് സർവീസസ് എക്സാമിന് (ഇഎസ്ഇ) യുപിഎസ്‌‌സി അപേക്ഷ ക്ഷണിച്ചു. www.upsconline.nic.in. അവസാന തീയതി: ഒക്ടോബർ 4.

സിവിൽ, മെക്കാനിക്കൽ, ഇലക്ട്രിക്കൽ, ഇലക്ട്രോണിക്സ് & ടെലികമ്യൂണിക്കേഷൻ എന്നിങ്ങനെ 4 കാറ്റഗറികളിലായി 327 ഒഴിവ് പ്രതീക്ഷിക്കുന്നു. വിശദാംശങ്ങൾ വെബ്സൈറ്റിലുണ്ട്. എൻജിനീയറിങ് ബിരുദധാരികൾക്കു പുറമേ, വയർലെസ് കമ്യൂണിക്കേഷൻ ഇലക്‌ട്രോണിക്‌സ്, റേഡിയോ ഫിസിക്‌സ്/റേഡിയോ എൻജിനീയറിങ് എന്നിവ പഠിച്ച് എംഎസ്‌‌സി നേടിയവർക്കും അപേക്ഷിക്കാം. 

∙ പ്രായം: 2023 ജനുവരി ഒന്നിന് 21–30. അർഹർക്കു നിയമാനുസൃത ഇളവ്. 

∙ തിരഞ്ഞെടുപ്പ്: പ്രിലിമിനറി പരീക്ഷ 2023 ഫെബ്രുവരി 19 നു നടക്കും. കൊച്ചിയിലും തിരുവനന്തപുരത്തും കേന്ദ്രമുണ്ട്. മെയിൻ പരീക്ഷയ്ക്കു തിരുവനന്തപുരത്തു കേന്ദ്രമുണ്ട്.

∙ അപേക്ഷാഫീസ്: 200 രൂപ. സ്‌ത്രീകൾക്കും പട്ടികവിഭാഗക്കാർക്കും അംഗപരിമിതർക്കും ഫീസ് വേണ്ട. 

Content Summary : UPSC ESE 2023 - Apply Online For 327 Vacancies