പാഞ്ഞെത്തുന്ന ട്രെയിനിനു മുന്നിൽ ആനക്കുട്ടിയും അമ്മയും; രക്ഷിച്ച് ലോക്കോ പൈലറ്റുമാർ: വിഡിയോ

ആനക്കുട്ടിയും അമ്മയും ഉൾപ്പെടുന്ന കാട്ടാനക്കൂട്ടം റെയിൽപാളം മുറിച്ചു കടക്കുന്നത് കണ്ട് ട്രെയിൻ നിർത്തി അവയെ രക്ഷിച്ച ലോക്കോ പൈലറ്റുമാർക്ക് അഭിനന്ദന പ്രവാഹം. വടക്കൻ ബംഗാളിലാണ് സംഭവം നടന്നത്. റെയിൽ പാളം മുറിച്ചു കടക്കുന്നതിനിടയിൽ ട്രെയിൻ തട്ടി ആനകൾ ചരിയുന്ന സംഭവം ഇവിടെ പതിവാണ്. വടക്കു കിഴക്കൻ റെയിൽവേയുടെ അലിപുർഡ്വാർ വിഭാഗമാണ് ഈ ദൃശ്യം ട്വിറ്ററിലൂടെ ആദ്യം പങ്കുവച്ചത്.

ലോക്കോ പൈലറ്റായ എസ്. സി ശങ്കറും അസിറ്റൻഡ് ലോക്കോ പൈലറ്റായ ടി. കുമാറുമാണ് അവസരോചിതമായി ട്രെയിൻ നിർത്തി കാട്ടാനകളുടെ ജീവൻ രക്ഷിച്ചത്. കാട്ടാനകൾ പാളം മുറിച്ചു കടക്കുന്നത് ശ്രദ്ധയിൽ പെട്ട ഇവര്‍ ഉടൻതന്നെ ട്രെയിനിന്റെ വേഗം നിയന്ത്രിച്ച ശേഷം ട്രെയിൻ നിർത്തുകയാണ് ചെയ്തത്. വൈൽഡ് ലൈഫ് ട്രസ്റ്റ് ഇന്ത്യയും ട്വിറ്ററിലൂടെ ഈ ദൃശ്യം പങ്കുവച്ചിരുന്നു.

അലിപുർഡ്വാർ ആനത്താരയിലൂടെ കടന്നു പോകുന്ന റെയിൽ പാളത്തിൽ ട്രെയിൻ തട്ടി ആനകൾ ചരിയുന്നത് പതിവാണ്. വൈദ്യുത വേലിയിൽ തട്ടിയും ആനകൾക്ക് ജീവൻ സഷ്ടമാകുന്ന സംഭവങ്ങൾ ഈ മേഖലയിൽ കൂടുതലാണ്. ഇതിനെതിരെ കഴിഞ്ഞ വർഷം ഗവൺമെന്റ് പ്രചാരണ പരിപാടികൾ ശക്തമാക്കിയിരുന്നു. വന്യമൃഗങ്ങളെ സംരക്ഷിക്കേണ്ടതിന്റെ ആവശ്യതകളെക്കുറിച്ച് ജനങ്ങളെ ബോധവാൻമാരാക്കുകയായിരുന്നു പരിപാടിയുടെ ലക്ഷ്യം. അലിപുർഡ്വാർ, ജൽപായ്ഗുരി, ഡാർജിലിങ് മേഖല കേന്ദ്രീകരിച്ചായിരുന്നു ബോധവൽക്കരണം.

English Summary:  Loco Pilots Halt Train To Allow Wild Elephants To Pass