വളർത്താനായി വാങ്ങിയത് വിഷം നീക്കിയ മൂർഖനെ, യുവാവിന് കിട്ടിയത് വിഷപ്പാമ്പിനെ, ഒടുവിൽ?

വിദേശ രാജ്യങ്ങളിൽ പലരും പാമ്പിനെയും അരുമമൃഗമായി വളർത്താറുണ്ട്. ഇത്തരത്തിൽ വീട്ടിൽ വളർത്താൻ പാമ്പിലെ ഓൺലൈനായി വാങ്ങിയ യുവാവിന് സംഭവിച്ച അബദ്ധമാണ് ഇപ്പോൾ സമൂഹമാധ്യമങ്ങളിൽ നിറയുന്നത്. ചൈനയിൽ നിന്നാണ് ഈ വിചിത്രവാർത്ത. വടക്കുകിഴക്കൻ ചൈനയിലെ ഹീലോങ്‌യാങ് പ്രവിശ്യയിലുള്ള ലിയു എന്ന യുവാവാണ് ഓൺലൈൻ സൈറ്റിലൂടെ മൂർഖൻ പാമ്പിനെ വളർത്താൻ വാങ്ങിയത്. വിഷവും പല്ലും നീക്കിയ ശേഷമാണ് സാധാരണയായി വളർത്താനായി പാമ്പുകളെ എത്തിക്കാറുള്ളത്.

ഏകദേശം ഒരു മീറ്ററോളം നീളമുള്ള മൂർഖനെയാണ് യുവാവിന് ലഭിച്ചത്. എന്നാൽ കുറച്ച് ദിവസങ്ങൾക്കുള്ളിൽ തന്നെ ഇയാളെ പാമ്പ് കടിച്ചു. ആശുപത്രിയിലെത്തിയപ്പോഴാണ് പാമ്പിന് വിഷമുണ്ടെന്ന കാര്യം തിരിച്ചറിയുന്നത്. മൂർഖന്റെ കടിയേറ്റ യുവാവിന്റെ ജീവനും അപകടത്തിലായിരുന്നു. എന്നാൽ കൃത്യമായ ചികിൽസ ലഭിച്ചതോടെ ഇയാൾ രക്ഷപ്പെട്ടു. പിന്നാലെ നടത്തിയ അന്വേഷണത്തിലാണ് പാമ്പിനെ പായ്ക് ചെയ്പ്പോൾ സംഭവിച്ച അബദ്ധമാണ് പ്രശ്നങ്ങൾക്ക് കാരണമെന്ന് വ്യക്തമായത്. വിഷവും പല്ലുമുള്ള മൂർഖനെയാണ് അബദ്ധത്തിൽ യുവാവിന് വളർത്താൻ സൈറ്റ് എത്തിച്ചുനൽകിയത്. ഗ്ലോബൽ ടൈംസാണ് ഈ വാർത്ത റിപ്പോർട്ട് ചെയ്തിരിക്കുന്നത്. 

English Summary: Man sleeps with 'detoxified' cobra, almost gets killed after shop sends the wrong snake