ജർമനിയിൽ ഒറ്റദിനം പതിനായിരത്തിലേറെ കോവിഡ് രോഗികൾ; ഞെട്ടൽ

ബർലിൻ ∙ ജർമ്മൻ ജനതയെ ഞെട്ടിച്ചുകൊണ്ട് കോവിഡ് രോഗികളുടെ പ്രതിദിന എണ്ണത്തിൽ വൻ വർധന. 24 മണിക്കൂറിനുള്ളിൽ ജർമനിയിൽ കോവിഡ് ബാധിച്ചത് 11287 പേർക്കാണ്. പ്രമുഖ വൈറോളജി ലാബായ റോബർട്ട് കോഹാണ് വ്യാഴാഴ്ച ഈ വിവരം പുറത്തു വിട്ടത്. ജർമ്മനിയിൽ ഇതിനകം 76000 പേർക്ക് കോവിഡ് ബാധിച്ചെന്നാണ് സർക്കാർ കണക്ക്.

കഴിഞ്ഞ ദിവസം 30 പേർ കോവിഡ് ബാധിച്ച് മരണമടഞ്ഞു. ഇതോടെ ജർമ്മനിയിൽ ആകെ 9905 പേർ കോവിഡ് ബാധിച്ച് മരിച്ചു. ജർമനിയിൽ ഹോട്സ്പോട്ടുകൾ വർധിക്കുന്നതായും പൊതുജനം കടുത്ത നിയന്ത്രണങ്ങൾ പാലിക്കണമെന്നും ആരോഗ്യവകുപ്പ് പ്രത്യേക നിർദേശം നൽകിയിരുന്നു.

ജർമൻ ആരോഗ്യവകുപ്പ് മന്ത്രി യെൻസ് സഫാനെയും കോവിഡ് ബാധിച്ചു. 14 ദിവസത്തേക്ക് മന്ത്രി ക്വാറന്റീനിൽ പ്രവേശിച്ചു. മന്ത്രിയുമായി കഴിഞ്ഞ 48 മണിക്കൂറിനുള്ളിൽ നേരിട്ട് ബന്ധപ്പെട്ടവർ കോവിഡ് ടെസ്റ്റിന് വിധേയമാകണമെന്ന് നിർദേശം നൽകിയിട്ടുണ്ട്.