കിരീടധാരണത്തിനു ഒരുങ്ങി ലണ്ടൻ; നഗരത്തിൽ ശക്തമായ മഴ

ലണ്ടൻ ∙ ചാൾസ് രാജാവിന്റെ കിരീടധാരണച്ചടങ്ങിന്റെ അവസാന മിനുക്കു പണികളിൽ ലണ്ടൻ മുഴുകുമ്പോൾ നഗരത്തെ മുക്കി ശക്തമായ മഴ. നാളെ കിരീടധാരണ ചടങ്ങുകൾ നടക്കേണ്ട അതേ സമയത്ത് ഇന്നു ലണ്ടനിൽ ശക്തമായ മഴയാണ്. ചടങ്ങുകൾ പള്ളിക്കുള്ളിലാണ് നടക്കുന്നത് എന്നതിനാൽ മഴ ശല്യമാകില്ല. എന്നാൽ, നാളെയും മഴ പെയ്താൽ ചടങ്ങുകൾ വീക്ഷിക്കാനും ഘോഷയാത്ര കാണുന്നതിനും മറ്റുമായി പുറത്തു കൂടിനിൽക്കുന്ന ജനങ്ങൾക്ക് അത് ബുദ്ധിമുട്ട് സൃഷ്ടിക്കും. രാവിലെ ആറുമുതൽ ഉച്ചകഴിഞ്ഞ് 2.30 വരെയാണ് ചടങ്ങുകളും പരേഡും ഉൾപ്പെടെയുള്ള പരിപാടികൾ.

ലണ്ടൻ സമയം 11.40ഓടെ ആരംഭിച്ച മഴ ഏതാനും മണിക്കൂറുകൾ നീണ്ടു. നിരവധി പേരാണ് ചാൾസ് രാജാവിന്റെ കിരീടധാരണച്ചടങ്ങുകൾ വീക്ഷിക്കാനായി നഗരത്തിലേക്ക് എത്തിയിരിക്കുന്നത്. അപ്രതീക്ഷിതമായി പെയ്ത മഴ നാളെയും തുടർന്നാൽ ഘോഷയാത്ര ചടങ്ങുകളെ പോലും ബാധിക്കുമോ എന്ന ആശങ്കയുമുണ്ട്. നാളെ മേഘാവൃതമായ ആകാശമായിരിക്കുമെന്നും മഴയ്ക്ക് സാധ്യതയുണ്ടെന്നുമാണ് യുകെ മെറ്റ് ഓഫീസ് നൽകുന്ന വിവരം. 

English Summary: King Charles III Coronation weather