വാഹനാപകടങ്ങൾ: ഗതാഗത കുരുക്ക് ഒഴിവാക്കാൻ ശ്രദ്ധവേണം

ദോഹ ∙ ഗുരുതരമല്ലാത്ത വാഹനാപകടങ്ങൾ സംഭവിച്ചാൽ ഗതാഗത കുരുക്കിനിടയാക്കാതെ വാഹനങ്ങൾ അടുത്ത പാർക്കിങ് സ്ഥലത്തേക്ക് മാറ്റിയിടണമെന്ന് ആഭ്യന്തര മന്ത്രാലയം. ചെറിയ അപകടങ്ങളെ തുടർന്ന് ഗതാഗതത്തിന് തടസ്സം സൃഷ്ടിക്കുന്നത് ഗതാഗത ലംഘനമാണെന്നും മന്ത്രാലയം അധികൃതർ. ഗുരുതരമല്ലാത്ത വാഹനാപകടങ്ങൾ മന്ത്രാലയത്തിന്റെ ഇ-പോർട്ടലായ മെട്രാഷ്-2 വഴി അധികൃതരെ അറിയിക്കണമെന്നും നിർദേശമുണ്ട്. മലയാളം ഉൾപ്പെടെയുള്ള ഭാഷകളിൽ മെട്രാഷ് 2– ന്റെ സേവനം ലഭിക്കും. അപകടം സംഭവിച്ച സ്ഥലത്ത് നിന്നു വേഗത്തിൽ വാഹനങ്ങൾ തൊട്ടടുത്ത പാർക്കിങ്ങിലേക്ക് മാറ്റിയ ശേഷം വേണം റിപ്പോർട്ട് ചെയ്യാൻ.

അപകടം റിപ്പോർട്ട് ചെയ്യേണ്ട വിധം

∙നമ്പർ പ്ലേറ്റ് ഉൾപ്പെടെ 2 വാഹനങ്ങളുടെയും 4 ചിത്രങ്ങൾ എടുക്കണം.

∙ മൊബൈലിലെ ലൊക്കേഷൻ സേവനം പ്രവർത്തനക്ഷമം എന്നുറപ്പാക്കിയശേഷം മെട്രാഷ്-2 ൽ സൈൻ ഇൻ ചെയ്യുക

∙ 2 വാഹനങ്ങളുടെയും നമ്പർ, വാഹന ഉടമകളുടെ ഖത്തർ ഐഡി നമ്പർ, മൊബൈൽ നമ്പർ എന്നീ വിവരങ്ങൾ അപ്‌ലോഡ് ചെയ്യുക.

∙2 വാഹനങ്ങളുടെയും ചിത്രങ്ങൾ അറ്റാച്ച് ചെയ്ത ശേഷം 'ഐ എഗ്രി ഓൺ വാലിഡിറ്റി ഓഫ് ഡേറ്റ' എന്നതിൽ ക്ലിക്ക് ചെയ്യുക. തുടർന്നു സബ്മിറ്റിൽ ക്ലിക്ക് ചെയ്യുക.

∙ അപേക്ഷ സ്വീകരിച്ചതായി മൊബൈലിൽ സന്ദേശം ലഭിക്കും.

∙ ഗതാഗത അന്വേഷണ വകുപ്പ് ചിത്രങ്ങളും വിവരങ്ങളും പരിശോധിച്ച ശേഷം 2 വാഹന ഉടമകൾക്കും സന്ദേശം അയയ്ക്കും. ഇൻഷുറൻസ് കമ്പനിയിൽ പോകാനോ അല്ലെങ്കിൽ അറ്റകുറ്റപ്പണിക്കുള്ള അനുമതി സന്ദേശമോ ലഭിക്കും