യുവാക്കൾക്ക് വേണം, വേഗപ്പൂട്ട്

അബുദാബി ∙ പുതുതായി ഡ്രൈവിങ് ലൈസൻസ് ലഭിച്ച യുവ ഡ്രൈവർമാരുടെ വാഹനങ്ങളിൽ വേഗപ്പൂട്ട് സ്ഥാപിക്കണമെന്ന് ആഭ്യന്തര മന്ത്രാലയത്തിലെ ട്രാഫിക് കൗൺസിലിന്റെ നിർദേശം. അപകടങ്ങൾ കുറയ്ക്കുന്നതിന്റെ ഭാഗമായി സമർപ്പിച്ച നിർദേശം യുവജന മന്ത്രാലയം ചർച്ച ചെയ്തു.

18നും 35നും ഇടയിൽ പ്രായമുള്ളവർക്കു ലൈസൻസ് ലഭിച്ചാൽ ആദ്യ 2 വർഷം വാഹനത്തിൽ വേഗനിയന്ത്രണ സംവിധാനം സ്ഥാപിക്കാനാണ് നിർദേശിച്ചിരിക്കുന്നത്. വാഹനവുമായി റോഡിൽ ഇറങ്ങുന്ന ഇവരുടെ പെരുമാറ്റവും മറ്റും നിരീക്ഷിക്കാനും ഇതിൽ സംവിധാനമുണ്ടാകും. വാഹനാപകടങ്ങളിൽ യുവാക്കളുടെ പങ്ക് വർധിച്ച പശ്ചാത്തലത്തിലാണ് പുതിയ നിർദേശം.