സാഗരാരവം തീർത്ത് ബഹ്റൈനിൽ നരേന്ദ്ര മോദി

മനാമ∙ പൊതുസമ്മേളനം നടന്ന നാഷനൽ സ്റ്റേഡിയത്തിലേക്കു വൈകിട്ടു മൂന്നോടെ തന്നെ ജനം പ്രവഹിച്ചുകൊണ്ടിരുന്നു. രണ്ടര മണിക്കൂറോളം നീണ്ട സാംസ്കാരിക പരിപാടികളാണ് അരങ്ങേറിയത്. തിങ്ങിനിറഞ്ഞ സ്റ്റേഡിയത്തിലേക്ക് സന്ധ്യയോടെ പ്രധാനമന്ത്രി എത്തിയപ്പോൾ ആവേശം അണപൊട്ടി.

ത്രിവർണ പതാകകൾ വീശിയും തൊണ്ടപൊട്ടി ജയ്ഹിന്ദ് വിളിച്ചും സാഗരാരവം തന്നെ തീർത്തു. ഏഷ്യയിലെ മൂന്നാമത്തെ ഏറ്റവും ചെറിയ രാജ്യത്തേക്ക് ലോകത്തെ ഏറ്റവും വലിയ ജനാധിപത്യരാജ്യമായ ഇന്ത്യയുടെ പ്രധാനമന്ത്രി എത്തിയപ്പോൾ ഇരുരാജ്യങ്ങളുടെയും ചരിത്രത്തിൽ അതു പുതിയ അധ്യായമായി.