സഹിഷ്ണുത; യുഎഇ ലോകത്തിന് മാതൃകയെന്ന് മാർപാപ്പ
Mail This Article
ദുബായ് ∙ സഹിഷ്ണുതയും സഹവർത്തിത്വവും സമാധാനവും നിലനിർത്താൻ യുഎഇ നടത്തുന്ന ശ്രമങ്ങൾ പ്രകീർത്തിക്കപ്പെടേണ്ടതാണെന്നു ഫ്രാൻസിസ് മാർപാപ്പ. വിവിധ മതങ്ങളെയും സംസ്കാരങ്ങളെയും ഉൾക്കൊള്ളുന്നതിലും സമഭാവനയോടെ കാണുന്നതിലും യുഎഇ ലോകത്തിനു മാതൃകയാണ്. കഴിഞ്ഞ ഫെബ്രുവരിയിൽ താൻ നടത്തിയ യുഎഇ സന്ദർശനം മധുരസ്മരണകൾ സമ്മാനിക്കുന്നതാണെന്നും ചൂണ്ടിക്കാട്ടി.
വത്തിക്കാനിൽ തന്നെ സന്ദർശിച്ച മാഡ്രിഡിലെ യുഎഇ സ്ഥാനപതി കാര്യാലയം ഉദ്യോഗസ്ഥർ, എമിറേറ്റ്സ് സെന്റർ ഫോർ സ്ട്രാറ്റജിക് സ്റ്റഡീസ് ആൻ റിസർച് പ്രതിനിധികൾ എന്നിവർ ഉൾപ്പെട്ട സംഘത്തോടു സംസാരിക്കുകയായിരുന്നു ഫ്രാൻസിസ് മാർപാപ്പ.
യുഎഇ പ്രസിഡന്റ് ഷെയ്ഖ് ഖലീഫ ബിൻ സായിദ് അൽ നഹ്യാൻ, വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം, അബുദാബി കിരീടാവകാശിയും യുഎഇ ഉപസർവ സൈന്യാധിപനുമായ ഷെയ്ഖ് മുഹമ്മദ് ബിൻ സായിദ് അൽ നഹ്യാൻ, വിവിധ എമിറേറ്റുകളിലെ ഭരണാധികാരികൾ എന്നിവരുടെ ആശംസകൾ സ്ഥാനപതി കാര്യാലയത്തിലെ സാമ്പത്തിക, രാഷ്ട്രീയ, മാധ്യമവിഭാഗം മേധാവി സാറാ അൽ മഹ്റി മാർപാപ്പയെ അറിയിച്ചു.
english summary: uae is role model of tolerance, coexistence, peace: pope francis