ബഹ്റൈനിൽ ‘ഉച്ചവിശ്രമം’ ഇന്നു മുതൽ
Mail This Article
മനാമ ∙ ബഹ്റൈനിൽ ഉച്ചവിശ്രമ നിയമം ഇന്നു പ്രാബല്യത്തിൽ വരും. പുറംജോലി ചെയ്യുന്ന തൊഴിലാളികൾക്ക് ഒാഗസ്റ്റ് വരെ ഉച്ചവിശ്രമം അനുവദിക്കണം. ഉച്ചയ്ക്കു 12 മുതൽ വൈകിട്ടു 4വരെയാണിത്.
രാജ്യത്തെ 30,000 കമ്പനികൾക്ക് ഇതു ബാധകമാണ്. നിയമലംഘനങ്ങൾ കണ്ടെത്താൻ കർശന പരിശോധനയുണ്ടാകും. കുറ്റക്കാർക്ക് 3 മാസം വരെ തടവും ചുരുങ്ങിയത് 500 ദിനാർ പിഴയുമാണു ശിക്ഷ. നിയമലംഘനങ്ങൾ ശ്രദ്ധയിൽപ്പെട്ടാൽ പൊതുജനങ്ങൾക്കും പരാതി നൽകാം. ഫോൺ: 17873648.
വേനൽക്കാലത്ത് ജോലിചെയ്യുമ്പോൾ പാലിക്കേണ്ട കാര്യങ്ങളെക്കുറിച്ച് തൊഴിലാളികൾക്കു ബോധവൽകരണം നൽകണമെന്ന് കമ്പനിയുടമകൾക്ക് തൊഴിൽ മന്ത്രാലയം നിർദേശം നൽകി. വിശ്രമവേളയിൽ തൊഴിലാളികളെ സുരക്ഷിത സ്ഥാനത്തേക്കു മാറ്റുകയും കുടിവെള്ളം ലഭ്യമാക്കുകയും വേണം.
കഴിഞ്ഞവർഷം 98% കമ്പനികളും നിയമം പാലിച്ചതായി തൊഴിൽ മന്ത്രി ജമീൽ ബിൻ മുഹമ്മദ് അലി ഹുമൈദാൻ പറഞ്ഞു.