പരിസ്ഥിതി നിയമം ലംഘിച്ചാൽ പിഴ ഒരു കോടി ദിർഹം

അബുദാബി∙ പരിസ്ഥിതി നിയമലംഘനത്തിന് അബുദാബിയിൽ ഒരു കോടി ദിർഹം (20.43 കോടി രൂപ) പിഴ. പുതിയ പരിസ്ഥിതി നിയമത്തിലാണു ശിക്ഷ കടുപ്പിച്ചത്. നേരത്തെ 10,000 ദിർഹമായിരുന്നു പിഴ.  വർധന 1000 മടങ്ങ്. നിയമം ലംഘിച്ച സ്ഥാപനം അടച്ചുപൂട്ടുകയും ചെയ്യും. ജൈവ വൈവിധ്യവും പരിസ്ഥിതിയും സംരക്ഷിക്കുന്നതിന്റെ ഭാഗമായാണ് തീരുമാനമെന്ന് അബുദാബി എൻവയൺമെന്റ് അതോറിറ്റി അറിയിച്ചു. പുതിയ നിയമത്തിന് എക്സിക്യൂട്ടീവ് കൗൺസിലിന്റെ അംഗീകാരവും ലഭിച്ചിട്ടുണ്ട്.

മരുഭൂമിയിലെ തനത് ചെടികളുടെ സംരക്ഷണത്തിനും ഹരിതവൽക്കരണത്തിനും പ്രസിഡന്റ് ഷെയ്ഖ് ഖലീഫ ബിൻ സായിദ് അൽ നഹ്യാൻ പുതിയ നിയമവും പ്രഖ്യാപിച്ചിട്ടുണ്ട്.