തിരിച്ചുവരവ് ഗംഭീരമാക്കി ഖത്തർ സ്പോർട്സ് ക്ലബ്ബ്
Mail This Article
ദോഹ ∙ ഖത്തർ സ്റ്റാർസ് ലീഗിന്റെ പുതിയ സീസണിൽ (ക്യുഎസ്എൽ) തുടർച്ചയായ രണ്ട് മത്സരങ്ങളിലും തോൽവി രുചിച്ചെങ്കിലും കരുത്തരായ അൽ റയ്യാനെതിരെ അട്ടിമറി ജയം കരസ്ഥമാക്കി ഖത്തർ സ്പോർട്സ് ക്ലബ്ബ് തിരിച്ചുവരവ് ഗംഭീരമാക്കി. ശനിയാഴ്ച സുഹെയിം ബിൻ ഹമദ് സ്റ്റേഡിയത്തിൽ നടന്ന 3-ാം റൗണ്ട് മത്സരത്തിലാണ് എതിരില്ലാത്ത ഒരു ഗോളിന് അൽ റയ്യാന് മേൽ ഖത്തർ സ്പോർട്സ് ക്ലബ്ബ് വിജയം നേടിയത്.
70-ാം മിനിട്ടിൽ കെയ്കെ റോഡ്രിഗ്രസാണ് വിജയ ഗോൾ നേടിയത്. കഴിഞ്ഞ ക്യുഎസ്എൽ സീസണിലെ രണ്ടാം സ്ഥാനക്കാരാണ് ഖത്തർ സ്പോർട്സ് ക്ലബ്ബിന്റെ പ്രതിരോധത്തിന് മുമ്പിൽ പരാജയപ്പെട്ടത്. ഇതേ സ്റ്റേഡിയത്തിൽ നടന്ന മറ്റൊരു മത്സരത്തിൽ അൽ കർത്തിയാത്തിനെ എതിരില്ലാത്ത 2 ഗോളുകൾക്ക് അൽ സെയ്ലിയയും പരാജയപ്പെടുത്തി. അൽ ദുഹെയ്ൽ ക്ലബ്ബിൽ നടന്ന മത്സരത്തിൽ ഉംസലാലിനെ അൽ വക്ര എതിരില്ലാത്ത ഒരുഗോളിനും പരാജയപ്പെടുത്തിയാണ് ജേതാക്കളായത്. എഎഫ്സി ചാംപ്യൻസ് ലീഗ് മത്സരങ്ങളെ തുടർന്ന് അൽ ദുഹെയ്ലും അൽ സദ്ദും തമ്മിലുള്ള 3-ാം റൗണ്ട് മത്സം ഒക്ടോബർ 27 ലേക്ക് മാറ്റി.
ഇതുവരെ നടന്ന മത്സരങ്ങളിൽ 6 പോയിന്റുമായി അൽ സദ്ദാണ് ഒന്നാമത്. അൽ അഹ്ലിക്കും അൽ വക്രയ്ക്കും 6 പോയിന്റുകൾ വീതമുണ്ടെങ്കിലും ഗോൾ ശരാശരിയുടെ അടിസ്ഥാനത്തിൽ ലീഗിൽ യഥാക്രമം രണ്ടും മൂന്നും സ്ഥാനത്താണ് ഇവർ. 4-ാം റൗണ്ട് മത്സരങ്ങൾക്ക് ഒക്ടോബർ 22 ന് തുടക്കമാകും.