യുഎഇയിൽ 842 പേർക്ക് കൂടി കോവിഡ്; ഒരു മരണം, രോഗമുക്തർ 821
Mail This Article
അബുദാബി ∙ കഴിഞ്ഞ 24 മണിക്കൂറിനിടെ യുഎഇയിൽ 842 പേർക്ക് കൂടി കോവിഡ് 19 സ്ഥിരീകരിച്ചു. 821 പേർക്ക് കൂടി രോഗം ഭേദമായതായും ഒരാൾ മരിച്ചതായും ആരോഗ്യ–രോഗപ്രതിരോധ മന്ത്രാലയം അറിയിച്ചു. ആകെ രോഗികൾ: 81,782. രോഗമുക്തി നേടിയവർ: 71,456. ആശുപത്രിയിൽ ചികിത്സയിലുള്ളവർ: 9,924.
രാജ്യത്ത് പരിശോധന ശക്തമായി തുടരുന്നു. ആകെ മരണം: 402. 94,000 പേർക്ക് കൂടി പരിശോധന നടത്തിയപ്പോഴാണ് 842 പേർക്ക് പുതുതായി രോഗം സ്ഥിരീകരിച്ചത്. രാജ്യത്ത് ഇതുവരെ 83 ത്തിലേറെ ലക്ഷം പേർക്ക് രോഗപരിശോധന നടത്തിതായി അധികൃതർ പറഞ്ഞു.
പ്രയത്നം പാഴാക്കരുത്
കോവിഡ് പ്രതിരോധ നിരയിൽ അഹോരാത്രം പ്രവർത്തിക്കുന്ന മുന്നണിപ്പോരാളികളുടെ പ്രയത്നം പാഴാക്കരുതെന്ന് അധികൃതരുടെ മുന്നറിയിപ്പ്. എല്ലാവരും സുരക്ഷാ മുൻകരുതലുകൾ പാലിക്കണം. സാമൂഹിക അകലം പാലിക്കുകയും കൂട്ടായ്മകളും സംഗമങ്ങളും ഒഴിവാക്കുകയും വേണമെന്നും നിർദേശിച്ചു.
ഇല്ലെങ്കിൽ ഇൗ മേഖലയിൽ പ്രവർത്തിക്കുന്ന ആരോഗ്യപ്രവർത്തകരുടെ പ്രയത്നത്തിന് വിലയില്ലാതായിപ്പോകുമെന്ന് ആവർത്തിച്ച് വ്യക്തമാക്കി.
ഓഗസ്റ്റ് 10ന് ശേഷം അഞ്ച് മടങ്ങ് രോഗികൾ വർധിച്ചതായി ആരോഗ്യ മന്ത്രാലയം വക്താവ് ഡോ.ഫരീദ അൽ ഹൊസനി അറിയിച്ചിരുന്നു. ഇതിൽ 88% പേർക്കും രോഗം ബാധിച്ചത് പാർട്ടികൾ, അനുശോചന പരിപാടികൾ തുടങ്ങിയ കൂട്ടായ്മകളിൽ നിന്നും ക്വാറന്റീൻ പ്രോട്ടോകോൾ ലംഘിച്ചതു മൂലവുമാണെന്ന് വ്യക്തമാക്കി.