ദേശസുരക്ഷയെ ബാധിക്കുന്ന വിവരങ്ങൾ പ്രചരിപ്പിച്ചാൽ നടപടി കടുക്കും
Mail This Article
അബുദാബി∙ ദേശ സുരക്ഷയ്ക്കും സ്ഥിരതയ്ക്കും വിഘാതമുണ്ടാക്കുന്ന ചിത്രങ്ങളും ദൃശ്യങ്ങളും വ്യാജ വിവരങ്ങളും സമൂഹമാധ്യമങ്ങളിൽ പ്രചരിപ്പിക്കുന്നവർക്കെതിരെ ശക്തമായ നടപടിയെടുക്കുമെന്ന് യുഎഇ പബ്ലിക് പ്രോസിക്യൂഷൻ.
ഇത്തരം നടപടികൾ വച്ചുപൊറുപ്പിക്കില്ലെന്ന് യുഎഇ അറ്റോർണി ജനറൽ ഡോ. ഹമദ് സെയ്ഫ് അൽ ഷംസി വ്യക്തമാക്കി.
കഴിഞ്ഞ ദിവസമുണ്ടായ ഹൂതി ആക്രമണവുമായി ബന്ധപ്പെട്ട ദൃശ്യങ്ങൾ പ്രചരിപ്പിച്ചവരെ വിളിച്ചുവരുത്തിയാണ് മുന്നറിയിപ്പ് നൽകിയത്. ഇത്തരം ദൃശ്യങ്ങൾ പ്രചരിപ്പിക്കുന്നത് സമൂഹത്തിൽ ആശയക്കുഴപ്പമുണ്ടാക്കും.
രാജ്യത്തെ നിയമങ്ങൾ പാലിക്കാൻ സ്വദേശികളും വിദേശികളും ബാധ്യസ്ഥരാണ്. കിംവദന്തികൾ പ്രചരിപ്പിക്കുന്നവർക്കെതിരെ കടുത്ത നടപടിയുണ്ടാകുമെന്നും ഓർമിപ്പിച്ചു. അനുമതിയില്ലാതെ മറ്റൊരാളുടെ ചിത്രവും ദൃശ്യവും എടുക്കുന്നതും പ്രചരിപ്പിക്കുന്നതും പ്രസിദ്ധീകരിക്കുന്നതും കുറ്റകരമാണെന്നും വ്യക്തമാക്കി.