സർക്കാർ സ്കൂളിൽ സ്വദേശികൾക്ക് സൗജന്യ വിദ്യാഭ്യാസ പദ്ധതി
Mail This Article
അബുദാബി∙ അത്യാധുനിക സൗകര്യങ്ങളോടെ സർക്കാർ സ്കൂളിൽ കൂടുതൽ സ്വദേശികൾക്കു സൗജന്യ വിദ്യാഭ്യാസത്തിന് അവസരമൊരുക്കുന്ന അജ്യാൽ സ്കൂൾ പദ്ധതി യുഎഇ പ്രഖ്യാപിച്ചു. നിലവിൽ സ്വകാര്യ സ്കൂളിൽ പഠിക്കുന്ന സ്വദേശികൾക്കു സർക്കാർ സ്കൂളിൽ ചേരാൻ അവസരമൊരുക്കുകയാണു ലക്ഷ്യം.
വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമാണ് പദ്ധതി പ്രഖ്യാപിച്ചത്. വിദ്യാഭ്യാസ രംഗത്തെ സമഗ്ര പരിഷ്ക്കാരത്തിന്റെ ഭാഗമായാണു പുതിയ സ്കൂൾ തുറക്കുന്നത്.
സ്വകാര്യ മാനേജ്മെന്റിന്റെ മേൽനോട്ടത്തിൽ 3 വർഷത്തിനകം 28 സർക്കാർ സ്കൂളുകൾ തുറന്നു 14,000 പൗരന്മാർക്കു ലോകോത്തര വിദ്യാഭ്യാസത്തിന് അവസരമൊരുക്കും. വർഷത്തിൽ 10 സ്കൂളുകൾ വീതമാണ് തുറക്കുക. കുട്ടികളുടെ ഫീസും അനുബന്ധ ചെലവുകളുമെല്ലാം സർക്കാർ വഹിക്കും.
ദേശീയ, രാജ്യാന്തര സിലബസ് അനുസരിച്ചായിരിക്കും പഠനം. പ്രാദേശിക സിലബസിൽ അറബിക്, ഇസ്ലാമിക് എജ്യുക്കേഷൻ, മോറൽ എജ്യുക്കേഷൻ, സോഷ്യൽ സ്റ്റഡീസ് എന്നിവ നിർബന്ധമായിരിക്കും. താലീം, അൽദാർ എജ്യുക്കേഷൻ, ബ്ലൂം എജ്യുക്കേഷൻ എന്നിവയ്ക്കായിരിക്കും നടത്തിപ്പ് ചുമതല.