ബാറ്ററി പുനരുപയോഗം: യുഎഇയിലെ ആദ്യ കമ്പനി റാസൽഖൈമയിൽ
Mail This Article
റാസൽഖൈമ ∙ ഉപയോഗിച്ച ബാറ്ററികൾ പുനരുപയോഗ യോഗ്യമാക്കുന്ന യുഎഇയിലെ ആദ്യ കമ്പനി റാസൽഖൈമ ഇക്കോണമിക് സോണിൽ ആരംഭിക്കും. ഇന്ത്യൻ കമ്പനിയായ ഹൈദരാബാദ് കാസ്റ്റിങ്സ് ലിമിറ്റഡും നഖാത് ഗ്രൂപ്പും ചേർന്നുള്ള റോയൽ ഗൾഫ് ഇൻഡസ്ട്രീസാണ് സംരംഭത്തിനു തുടക്കമിടുന്നത്.
അൽ ഗെയിൽ ഇൻഡസ്ട്രീസ് സോണിൽ നിർമിക്കുന്ന കമ്പനി ഈ വർഷം നാലാം പാദം പ്രവർത്തനമാരംഭിക്കും. ആദ്യഘട്ടത്തിൽ 150ൽ ഏറെ പേർക്കു ജോലി ലഭിക്കും. ഇതുസംബന്ധിച്ച ധാരണാപത്രത്തിൽ റോയൽ ഗൾഫ് ഇൻഡസ്ട്രീസ് എംഡി: യോഗേഷ് നഖാത് ജെയിനും റാസൽഖൈമ ഇക്കണോമിക് സോൺ സിഇഒ: റമി ജല്ലാഡും ഒപ്പുവച്ചു.
ഇതര രാജ്യങ്ങളിൽ നിന്നും ബാറ്ററികൾ ഇറക്കുമതി ചെയ്ത് പുനരുപയോഗപ്പെടുത്തുന്ന വൻ സംരംഭമാണിതെന്ന് റോയൽ ഗൾഫ് ഇൻഡസ്ട്രീസ് ചെയർമാൻ ഹനുമാൻ മാൽ നഖാത് പറഞ്ഞു. പ്രതിവർഷം 35,000 മെട്രിക് ടൺ ലെഡ് ആസിഡ് ബാറ്ററികൾ പുനരുപയോഗപ്പെടുത്താൻ കഴിയും. ഉപയോഗിച്ച ശേഷം ഉപേക്ഷിക്കുന്ന ബാറ്ററികൾ ഉയർത്തുന്ന പാരിസ്ഥിതിക ഭീഷണിക്കു പരിഹാരം കാണാൻ ഫാക്ടറിക്ക് കഴിയുമെന്നും ചൂണ്ടിക്കാട്ടി.