‘100 കോടി ഭക്ഷണപ്പൊതി’ പദ്ധതിക്ക് ആസ്റ്റർ വക 50 ലക്ഷം ദിർഹം

ദുബായ്∙ ദുർബല ജനസമൂഹത്തെ സഹായിക്കുന്നതിനു യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം പ്രഖ്യാപിച്ച ‘100 കോടി ഭക്ഷണപ്പൊതി’  പദ്ധതിയിലേക്ക് 50 ലക്ഷം ദിർഹം (11.16  കോടി രൂപ) സംഭാവന നൽകുമെന്നു ആസ്റ്റർ ഡിഎം ഹെൽത്ത് കെയർ ചെയർമാനും മാനേജിങ് ഡയറക്ടറുമായ ഡോ. ആസാദ് മൂപ്പൻ അറിയിച്ചു.

ലോകമെങ്ങുമുള്ള ലക്ഷക്കണക്കിന് ആളുകൾക്കു ഭക്ഷണമെത്തിക്കുന്ന പദ്ധതിയുടെ ഭാഗമാകുന്നതിൽ അഭിമാനമുണ്ടെന്ന് അദ്ദേഹം പറഞ്ഞു. മറ്റുള്ളവരോട് ദയ കാണിക്കുകയെന്നത് ഒരു ശീലമായി കാണേണ്ടതാണെന്ന സന്ദേശമാണ് പദ്ധതി നൽകുന്നതെന്നും വ്യക്തമാക്കി.