അവധിക്കാലം സാഹസികമാക്കാൻ നിരക്കിളവുമായി ജബൽജെയ്സ്
Mail This Article
റാസൽഖൈമ ∙ കടുത്ത ചൂടിലും തളരാത്ത വീര്യത്തോടെ റാസൽഖൈമയിലെ ജബൽജെയ്സ് അഡ്വഞ്ചർ പാർക്ക്. അവധിക്കാലം സാഹസികമാക്കാൻ നിരക്കിളവും പ്രഖ്യാപിച്ചു. അവധിക്കാലം മുഴുവൻ പാർക്ക് തുറക്കുമെന്നും അറിയിച്ചു.
യുഎഇയിലെ ഏറ്റവും ഉയരം കൂടിയ പർവതമായ ജബൽജെയ്സിൽനിന്ന് റാസൽഖൈമയുടെ താഴ്വാരത്തിലേക്കു നിമിഷനേരംകൊണ്ട് ഊർന്നിറങ്ങുന്ന സിപ് ലൈനാണ് ഏറ്റവും വലിയ ആകർഷണം. റാസൽഖൈമയുടെ ആകാശക്കാഴ്ച മനസ്സിന്റെ ഫ്രെയിമിൽ സൂക്ഷിക്കാൻ ഒട്ടേറെ പേരാണ് ദിവസേന എത്തുന്നതെന്ന് റാക് ലിഷർ അറിയിച്ചു. ലോകത്തിലെ ഏറ്റവും നീളം കൂടിയ സിപ് ലൈനുകളിൽ ഒന്നാണിത്. മണിക്കൂറിൽ 160 കി.മീ ആണ് സിപ് ലൈനിന്റെ വേഗം. സ്കൈ ടൂർ, ടോബോഗൻ തുടങ്ങി വ്യത്യസ്ത പാക്കേജുകളുണ്ട്. സിപ് ലൈനിനു 20 ശതമാനവും മേഖലയിലെ നീളംകൂടിയ ടോബോഗൻ റൈഡിന് 10 ശതമാനവുമാണ് ഇളവ്. സെപ്റ്റംബർ 15 വരെ രാവിലെ 10 മുതൽ വൈകിട്ട് 6 വരെയായിരിക്കും സ്കൈ ടൂർ. ഹജ്ർ മലനിരകൾക്കിടയിലൂടെയുള്ള ജെയ്സ് സ്ലൈഡർ ചൊവ്വ മുതൽ ഞായർ ദിവസങ്ങളിൽ ഉച്ചയ്ക്ക് 1 മുതൽ 7 വരെയും വാരാന്ത്യങ്ങളിൽ രാവിലെ 11 മുതൽ 7 വരെയുമാണ്.
വേനൽകാല വിനോദത്തിനു പറ്റിയതാണ് റാക് ലിഷർ എന്ന് ജനറൽ മാനേജർ സ്റ്റീവൻ ബിഷപ് പറഞ്ഞു.
English Summary: Jebel Jais Adventure Parks will offer its zip line, sky tour, and toboggan experiences throughout summer.