മുതിര്ന്ന യാത്രക്കാര്ക്ക് ഈടാക്കുന്ന തുക, ബോര്ഡിങ് പാസില് സീറ്റ് നമ്പര്; കുട്ടിക്ക് വിമാനത്തില് സീറ്റ് നല്കിയില്ലെന്ന് പരാതി
Mail This Article
ജിദ്ദ∙ മുതിര്ന്ന യാത്രക്കാര്ക്ക് ഈടാക്കുന്ന തുക വാങ്ങിക്കുകയും ബോര്ഡിങ് പാസില് സീറ്റ് നമ്പര് രേഖപ്പെടുത്തുകയും ചെയ്തിട്ടും മലയാളി കുടുംബത്തിലെ കുട്ടിക്ക് വിമാനത്തില് സീറ്റ് നല്കിയില്ലെന്ന് പരാതി. കഴിഞ്ഞ ദിവസം കോഴിക്കോട് നിന്ന് ജിദ്ദയിലേക്ക് സര്വീസ് നടത്തിയ സ്പൈസ് ജെറ്റിന്റെ എസ്.ജി 35 വിമാനത്തിലാണ് ഈ ദുരനുഭവം നേരിടേണ്ടി വന്നത്. ഉംറ വീസയില് ഉമ്മയോടൊപ്പം യാത്ര ചെയ്ത സൈഹ എന്ന രണ്ടു വയസ്സുകാരിക്കാണ് സീറ്റ് നൽകാതിരുന്നത്.
രണ്ട് വയസ്സ് കഴിഞ്ഞത് കൊണ്ട് തന്നെ മുതിര്ന്ന യാത്രക്കാര്ക്ക് ഈടാക്കുന്ന തുക ഈടാക്കുകയും ബോര്ഡിങ് പാസില് സീറ്റ് നമ്പര് രേഖപ്പെടുത്തുകയും ചെയ്തിരുന്നു. എന്നാല് നിശ്ചിത സീറ്റില് കുട്ടിയെ ഇരുത്താന് ജീവനക്കാര് അനുവദിച്ചില്ല. ഇരുത്തിയ സീറ്റില് നിന്ന് കുട്ടിയെ എടുക്കാന് ജീവനക്കാര് ആവശ്യപ്പെടുകയും ചെയ്തു. ബോര്ഡിങ് പാസ് കാണിച്ച് സീറ്റ് വേണമെന്ന് ആവശ്യപ്പെട്ടപ്പോള് കുട്ടിയായതിനാല് മടിയില് ഇരുത്തിയാല് മതിയെന്നാണത്രേ മറുപടി. കുട്ടിക്ക് സീറ്റിന് അര്ഹതയുണ്ടെന്നും സീറ്റില് ഇരിക്കാന് കുട്ടിക്ക് പ്രയാസമില്ലെന്നും അറിയിച്ചിട്ടും ജീവനക്കാര് പരിഗണിച്ചില്ലെന്ന് കുട്ടിയുടെ മാതാവ് പറഞ്ഞു. പരാതിയുടെ കോപ്പി സൗദി സിവില് ഏവിയേഷന് അതോറിറ്റിക്കും അയച്ചിട്ടുണ്ട്.
English Summary: No Seat fo Child: Complaint about not being given Seat on Flight for Child