ബഹുരാഷ്ട്ര കമ്പനികൾ റിയാദിലേക്ക് മാറ്റിയാൽ 30 വർഷത്തേക്ക് നികുതി ആനുകൂല്യം പ്രഖ്യാപിച്ച് സൗദി

ജിദ്ദ∙ ബഹുരാഷ്ട്ര കമ്പനികൾ അവരുടെ പ്രാദേശിക ആസ്ഥാനം റിയാദിലേക്ക് മാറ്റുന്ന സാഹചര്യത്തിൽ 30 വർഷത്തേക്ക് ആദായനികുതിയുടെ പൂജ്യം ശതമാനം ഉൾപ്പെടെയുള്ള നികുതി ആനുകൂല്യങ്ങൾ പ്രഖ്യാപിച്ച്  സൗദി അറേബ്യ.

രാജ്യാന്തര കമ്പനികൾക്ക് സൗദി അറേബ്യയിൽ പ്രാദേശിക ആസ്ഥാനം തുറക്കുന്നതിനുള്ള നടപടിക്രമങ്ങൾ പ്രോത്സാഹിപ്പിക്കുന്നതിനും സുഗമമാക്കുന്നതിനുമുള്ള ശ്രമത്തിന്റെ ഭാഗമായി ധനമന്ത്രാലയത്തിന്റെയും സകാത്ത്, നികുതി, കസ്റ്റംസ് അതോറിറ്റിയുടെയും ഏകോപനത്തോടെ നിക്ഷേപ മന്ത്രാലയമാണ് പ്രഖ്യാപനം നടത്തിയത്. രാജ്യാന്തര കമ്പനികളുടെ പ്രാദേശിക ആസ്ഥാനങ്ങളെ ആകർഷിക്കുന്നതിനുള്ള സൗദി പദ്ധതി നിക്ഷേപ മന്ത്രാലയവും റിയാദ് സിറ്റിക്കുള്ള റോയൽ കമ്മീഷനും തമ്മിലുള്ള സംയുക്ത സംരംഭമാണ്.  ഒരു കൂട്ടം ആനുകൂല്യങ്ങളും വ്യതിരിക്തമായ പിന്തുണാ സേവനങ്ങളും നൽകിക്കൊണ്ട്, സൗദി അറേബ്യയിൽ അവരുടെ പ്രാദേശിക ആസ്ഥാനം സ്ഥാപിക്കുന്നതിന് രാജ്യാന്തര കമ്പനികളെ ആകർഷിക്കാനും  ലക്ഷ്യമിടുന്നു.സൗദിവൽക്കരണ ആവശ്യകതകളിലെ വഴക്കം, എക്സിക്യൂട്ടീവുകളെ ആകർഷിക്കൽ, പ്രാദേശിക ആസ്ഥാനത്ത് പ്രവർത്തിക്കാനുള്ള വ്യതിരിക്തമായ കഴിവുകൾ എന്നിവ പോലെ, കമ്പനികളുടെ പ്രാദേശിക ആസ്ഥാനങ്ങൾക്ക് നികുതി ഇളവുകൾ നൽകുന്നത് ഈ കമ്പനികൾക്ക് നൽകുന്ന മറ്റ് ആനുകൂല്യങ്ങൾക്ക് പുറമേ,രാജ്യത്തെ പ്രാദേശിക ആസ്ഥാനങ്ങളുടെ പ്രധാന കേന്ദ്രമാക്കി മാറ്റുന്നതിനുള്ള പ്രധാന പ്രോത്സാഹനമാണെന്ന് നിക്ഷേപ മന്ത്രി ഖാലിദ് അൽ ഫാലിഹ് പറഞ്ഞു.

രാജ്യത്തിലെ വ്യതിരിക്തമായ കഴിവുകളുടെയും വൈദഗ്ധ്യത്തിന്റെയും സാന്നിധ്യവും അതിന്റെ തന്ത്രപ്രധാനമായ സ്ഥാനവും ശക്തമായ വളർച്ചാ സാധ്യതകളും 200 ലധികം കമ്പനികളെ പ്രോഗ്രാമിലേക്ക് ആകർഷിക്കാൻ സഹായിച്ചതായി മന്ത്രി പറഞ്ഞു.  വാസ്തവത്തിൽ, ലോകമെമ്പാടുമുള്ള നിരവധി മുതിർന്ന എക്സിക്യൂട്ടീവുകളും വിശിഷ്‌ടമായ പ്രഫഷനൽ കഴിവുകളുള്ള ആളുകളും പ്രദേശത്തെയും ലോകത്തെയും മറ്റ് സ്ഥലങ്ങളെ അപേക്ഷിച്ച് ജോലി ചെയ്യാനുള്ള മികച്ച സ്ഥലമായി രാജ്യം കണ്ടെത്തുന്നു.  അവരുടെ കരിയറിലെ പുരോഗതിയെ പിന്തുണയ്ക്കുന്നതിനാൽ രാജ്യം അവർക്ക് ആകർഷകവും പ്രചോദിപ്പിക്കുന്നതുമായ ഒരു ലക്ഷ്യസ്ഥാനമാണ്.

പ്രാദേശിക ആസ്ഥാന പ്രവർത്തനങ്ങൾക്ക് അനുവദിച്ച പുതിയ നികുതി ഇളവുകൾ രാജ്യത്തിലെ കമ്പനികളുടെ പ്രാദേശിക ആസ്ഥാനത്തിന് കാഴ്ചപ്പാടിന്റെയും സ്ഥിരതയുടെയും കൂടുതൽ വ്യക്തത നൽകുമെന്ന് ധനമന്ത്രി മുഹമ്മദ് അൽ ജദാൻ പറഞ്ഞു.  ഇത് അവരുടെ ആസ്ഥാനം രാജ്യത്തേക്ക് മാറ്റിസ്ഥാപിച്ചതിന് ശേഷം, മേഖലയിലെ അവരുടെ ബിസിനസ്സ് വിപുലീകരിക്കുന്നതുമായി ബന്ധപ്പെട്ട ഭാവി ആസൂത്രണത്തിനുള്ള അവരുടെ കഴിവുകൾ വർധിപ്പിക്കും. നാം സാക്ഷ്യം വഹിക്കുന്ന വികസനത്തിന്റെയും പരിവർത്തനത്തിന്റെയും പ്രക്രിയയിൽ ഈ കമ്പനികൾക്കും പങ്കാളികളാകാമെന്നും അദ്ദേഹം പറഞ്ഞു.  "2029-ലെ ഏഷ്യൻ വിന്റർ ഗെയിംസ്, 2030-ലെ വേൾഡ് എക്‌സ്‌പോ തുടങ്ങിയ പ്രധാന ഇവന്റുകൾ ആതിഥേയത്വം വഹിക്കാനുള്ള ഞങ്ങളുടെ ഒരുക്കങ്ങൾ പുരോഗമിക്കുന്ന വേളയിൽ എല്ലാ മേഖലകളിലും നടക്കുന്ന പ്രോജക്ടുകളിൽ പങ്കെടുക്കാൻ കൂടുതൽ രാജ്യാന്തര  കമ്പനികളെ സ്വാഗതം ചെയ്യാൻ ഞങ്ങൾ ആഗ്രഹിക്കുന്നുവെന്നും  മന്ത്രി കൂട്ടിച്ചേർത്തു.