അൽ റുവൈയ്യ മരുഭൂമിയിൽ വാഹന സ്റ്റണ്ട് നടത്തിയ അഞ്ച് കൗമാരക്കാർക്ക് പരുക്കേറ്റു

ദുബായ് ∙ അൽ റുവൈയ്യ മരുഭൂമിയിൽ അപകടകരമാംവിധം വാഹനത്തിൽ സ്റ്റണ്ട് നടത്തിയ അഞ്ച് കൗമാരക്കാർക്ക് പരുക്കേറ്റു. 18 നും 20 നും ഇടയിൽ പ്രായമുള്ളവർക്കാണ് പരുക്കേറ്റതെന്ന് ദുബായ് പൊലീസ് അറിയിച്ചു.

 19 കാരനായ സ്വദേശിയാണ് അപകടത്തിൽപ്പെട്ട എസ് യുവി ഒാടിച്ചത്. അശ്രദ്ധമായി ഡ്രൈവ് ചെയ്യുകയും മണൽപ്രദേശത്ത് സ്റ്റണ്ടുകൾ നടത്തുകയും ചെയ്തപ്പോൾ പെട്ടെന്നുള്ള വളവിൽ വാഹനം മറിയുകയായിരുന്നു. ഇയാൾക്കും വാനഹനത്തിലുണ്ടായിരുന്ന നാല് യാത്രക്കാർക്കും പരുക്കേറ്റു. ഇവരിൽ ചിലരുടെ പരുക്ക് സാരമുള്ളതാണെന്നു ദുബായ് പൊലീസ് ജനറൽ ഡിപ്പാർട്ട്‌മെന്റ് ഓഫ് ട്രാഫിക് ഡയറക്ടർ മേജർ ജനറൽ സെയ്ഫ് മുഹൈർ അൽ മസ്‌റൂയി പറഞ്ഞു.  

ഇന്നലെ(തിങ്കൾ) രാത്രി 9 നാണ് അപകട വിവരം പൊലീസിന് ലഭിച്ചത്. തുടർന്ന് ട്രാഫിക് പട്രോളിങ് ഉടൻ നടപടി സ്വീകരിച്ചതായി അദ്ദേഹം പറഞ്ഞു. എസ് യുവിയുടെ വിൻഡ്‌ഷീൽഡും ജനാലകളും തകർന്നു. പരുക്കേറ്റവരെ ആശുപത്രിയിൽ പ്രവേശിപ്പിച്ചതായി മേജർ ജനറൽ അൽ മസ്റൂയി പറഞ്ഞു.