യുഎഇയിൽ സ്വർണത്തിന് നേരിയ ഇടിവ്; ഗ്രാമിന് രണ്ട് ദിർഹം കുറഞ്ഞു

ദുബായ് ∙ ഒരാഴ്ചയായി തുടരുന്ന മുന്നേറ്റത്തിൽ നിന്ന് സ്വർണത്തിന് നേരിയ ഇടിവ്. ഇന്നലെ ഗ്രാമിന് 2 ദിർഹമാണ്  വിലയിടിഞ്ഞത്. ഗ്രാമിന് 265.25 ദിർഹം വിലയുണ്ടായിരുന്ന 24 കാരറ്റ് സ്വർണം ഇന്നലെ രാവിലെ വിറ്റത് ഗ്രാമിന് 263 ദിർഹത്തിനാണ്. 22 കാരറ്റിന് 243.5 ദിർഹവും 21 കാരറ്റിന് 235.75 ദിർഹവുമാണ് വില. പലിശ നിരക്കിൽ മാറ്റം വരുത്തില്ലെന്ന് യുഎസ് ഫെഡറൽ റിസർവ് പ്രഖ്യാപിച്ചതിനു പിന്നാലെ ബുധനാഴ്ച ഗ്രാമിന് 5 ദിർഹത്തിന്റെ വർധനയാണ് ദുബായിലുണ്ടായത്. എന്നാൽ, ഇന്നലെ ഡോളർ വീണ്ടും കരുത്തു പ്രാപിച്ചതോടെ സ്വർണ വിലയിൽ ഇടിവുണ്ടാവുകയായിരുന്നു.