ഭക്തി നിറവിൽ യുഎഇയിൽ നഗരികാണിക്കൽ

അബുദാബി ∙ കുരിശു മരണത്തിലൂടെ യേശുക്രിസ്തു മാനവരാശിക്കു നൽകിയ പുതുജീവിതത്തിന്റെ ഓർമ പുതുക്കി യേശുവിന്റെ തിരുസ്വരൂപ മാതൃകയുമായി മറുനാട്ടിലും നഗരി കാണിക്കൽ ശുശ്രൂഷ നടന്നു. അബുദാബി മുസഫയിലെ സെന്റ് പോൾസ് കത്തോലിക്കാ ദേവാലയത്തിൽ നടന്ന ശുശ്രൂഷകൾക്ക് ഫാ. ടോം ജോസഫ്  മുഖ്യകാർമികത്വം വഹിച്ചു.

വ്യത്യസ്ത സഭകളുടെതായി യുഎഇയിൽ 40ലേറെ ക്രൈസ്തവ ദേവാലയങ്ങൾ ഉണ്ടെങ്കിലും തിരുസ്വരൂപ മാതൃകയുമായി നഗരികാണിക്കൽ ചടങ്ങ് നടക്കുന്ന ഏക ദേവാലയമാണ് അബുദാബി മുസഫയിലെ സെന്റ് പോൾസ്. നാട്ടിൽ മാത്രം കണ്ടിട്ടുള്ള യേശുവിന്റെ വലിയ രൂപം ഒറ്റത്തടിയിൽ തീർത്ത് മറുനാട്ടിലെ വിശ്വാസികൾക്കായി എത്തിച്ചത് സൺറൈസ് മെറ്റൽ ഫാബ്രിക്കേഷൻ എസ്റ്റാബ്ലിഷ്മെന്റ് എംഡിയും മലയാളം കമ്യൂണിറ്റി കോ ഓർഡിനേറ്ററുമായ ലൂയിസ് കുര്യാക്കോസ് ആണ്.

7 ലക്ഷം രൂപ ചെലവിൽ കുമിൾ (കുമ്പിൾ) മരത്തിന്റെ ഒറ്റത്തടയിൽ തീർത്ത തിരുസ്വരൂപം എറണാകുളം കാത്തലിക് ആർട്ട് സെന്ററിലാണ് നിർമിച്ചത്.