15–ാമത് ഷാർജ കുട്ടികളുടെ വായനോത്സവം മേയ് 1 മുതൽ

ഷാർജ ∙ കൊച്ചുകൂട്ടുകാരെ സർഗാത്മകതയുടെ നവ ലോകത്തേയ്ക്ക് നയിക്കുന്ന 15–ാമത് ഷാർജ കുട്ടികളുടെ വായനോത്സവം മേയ് 1 മുതൽ 12 വരെ ഷാർജ എക്സ്പോ സെന്ററിൽ നടക്കും. വൺസ് അപോൺ എ ഹീറോ എന്ന പ്രമേയത്തിൽ ഷാർജ ബുക്ക് അതോറിറ്റി സംഘടിപ്പിക്കുന്ന 12 ദിവസം നീണ്ടുനിൽക്കുന്ന അക്ഷരോത്സവത്തിൽ 25 രാജ്യങ്ങളിൽ നിന്നുള്ള 190 എഴുത്തുകാരും  75 രാജ്യങ്ങളിൽ നിന്നുള്ള 470 പ്രസാധകരും പങ്കെടുക്കും. 1,400 കലാ സാംസ്കാരിക വിനോദ പരിപാടികൾ അരങ്ങേറും.

വായനോത്സവത്തിന് മുന്നോടിയായി ഈ മാസം 27, 28 തീയതികളിൽ പുസ്തക വിൽപനക്കാരുടെ സമ്മേളനം നടക്കും. ബുക്ക് സെല്ലേഴ്‌സ് കോൺഫറൻസ് പുസ്തക വിൽപ്പനക്കാരെയും വിതരണക്കാരെയും പ്രസാധകരെയും ഒരുമിച്ച് കൊണ്ടുവരുമെന്ന് അധികൃതർ പറഞ്ഞു. ഷാർജ ആനിമേഷൻ കോൺഫറൻസിന്റെ (എസ്എസി) രണ്ടാം പതിപ്പും മേയ് 1 മുതൽ സംഘടിപ്പിക്കും. പ്രശസ്ത ആനിമേറ്റർമാർ, കലാകാരന്മാർ, എഴുത്തുകാർ, ചിന്തകർ എന്നിവരെ ഒരുമിച്ച് കൊണ്ടുവരുന്ന ഇത്തരത്തിലുള്ള ആദ്യ പരിപാടിയാണിത്. മറ്റ് വ്യവസായ പ്രമുഖരും പങ്കെടുക്കും.

യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ.സുൽത്താൻ ബിൻ മുഹമ്മദ് അല്‍ ഖാസിമിയുടെ പിന്തുണയോടെ ഫാമിലി അഫയേഴ്സ് സുപ്രീം കൗൺസിൽ ചെയർപേഴ്സൻ ഷെയ്ഖ ജവഹർ ബിൻത് മുഹമ്മദ് അൽ ഖാസിമിയുടെ രക്ഷാകർതൃത്വത്തിലാണ് പരിപാടിയെന്ന് ഷാർജ ബുക്ക് അതോറിറ്റി സിഇഒ അഹമദ് ബിൻ റക്കാദ് അല്‍ അമേരി പറഞ്ഞു. ഷാർജ ബ്രോഡ്കാസ്റ്റിങ് അതോറിറ്റി ഡയറക്ടർ സാലെം അൽ ഗൈതി, വായനോത്സവം ജനറർ കൊ ഒാർഡിനേറ്റർ ഖൗല അൽ മുജൈനി, ബുക് അതോറിറ്റി പബ്ലിഷേഴ്സ് സർവീസസ് ഡയറക്ട‌ർ മൻസൂർ അൽ ഹസ്സനി, മുഹമ്മദ് അൽ അമിമി എന്നിവരും വാർത്താ സമ്മേളനത്തിൽ സംബന്ധിച്ചു.

∙30 പ്രഭാഷകർ; വൈവിധ്യമാർന്ന വിഷയങ്ങൾ
വായനോത്സവത്തിൽ 30 പ്രഭാഷകർ വിവിധ വിഷയങ്ങളിൽ പ്രസംഗിക്കും. കൂടാതെ 50 ചർച്ചകളും ഉണ്ടായിരിക്കുന്നതാണ്. അമേരിക്കയിലെ പ്രശസ്ത എഴുത്തുകാരായ ജെറി ക്രാഫ്റ്റ്, സ്റ്റാസി ബെയർ, മലേഷ്യൻ എഴുത്തുകാരനും പരിശീലകനുമായ യിങ് യിങ് എങ്, ജോർജിയൻ എഴുത്തുകാരൻ ഡോ.ലീഹ് ഷല്യാഷ്വിലി എന്നിവരാണ് പങ്കെടുക്കുന്ന വിദേശ എഴുത്തുകാരിൽ ചിലർ. അറബ് ലോകത്ത് നിന്ന് സിറിയൻ വിദ്യാഭ്യാസ വിചക്‌ഷണൻ ഡോ.താലിബ് ഉംറാൻ, അൾജീരിയൻ പണ്ഡിതൻ ഡോ.അൽ െഎദ് ജിലൂലി, ഒമാനി കവി വഫാ അൽ ഷംസി എന്നിവർ എത്തിച്ചേരും.

∙കുട്ടികളുടെ1,400 പരിപാടികൾ
കുട്ടികളുടെ മനംനിറയ്ക്കുന്ന 1400 പരിപാടികൾ 12 ദിവസവും അരങ്ങേറും. നാടകങ്ങൾ, ഷോകൾ, തത്സമയപരിപാടികൾ, എഴുത്തുകാരുമായുള്ള അഭിമുഖം തുടങ്ങിയവ ഇതിൽ പ്രധാനപ്പെട്ടവയാണ്. 12 രാജ്യങ്ങളിൽ നിന്നുള്ള 19 നാടകസംഘങ്ങളാണ് എത്തുക. 

∙ശില്പശാലകൾ, ചർച്ചകൾ
ശിൽപശാലകൾ, ചർച്ചകൾ എന്നിവയടക്കം 132 പരിപാടികൾ വായനോത്സവത്തിൽ നടക്കും. അനിമേഷൻ, കാരക്ടർ ക്രിയേഷൻ, കോമിക്സ് പോപ് ആർട് എന്നിവയിൽ പങ്കുചേരാൻ കുട്ടികൾക്ക് അവസരം ലഭിക്കും.

∙കുക്കറി ഷോ; ഇന്ത്യയിൽ നിന്ന് നന്ദിത അയ്യർ
കൂടാതെ, കുക്കറി കോർണറിൽ 12 രാജ്യങ്ങളിൽ നിന്നുള്ള 25 ഷെഫുമാർ തത്സമയ പാചകം അവതരിപ്പിക്കും. ഇന്ത്യയിൽ നിന്ന് നന്ദിത അയ്യരാണ് എത്തുക.

∙ബുക് ഇല്ലസ്ട്രേഷൻ അവാർഡ്
12–ാമത് കുട്ടികളുടെ ഷാർജ  ബുക് ഇല്ലസ്ട്രേഷൻ അവാർഡ് ഇതോടൊപ്പം നടക്കും. 48 രാജ്യങ്ങളിൽനിന്നുള്ള 507 എൻട്രികളാണ് ഇതിനായി ഇപ്രാവശ്യം ലഭിച്ചിട്ടുള്ളത്. കൂടാതെ, ഓഡിയോ ബുക്ക് അവാർഡുമുണ്ടായിരിക്കും.

∙അനിമേഷൻ സമ്മേളനം
അനിമേഷൻ സമ്മേളനം മേയ് 1 മുതൽ 5 വരെ അരങ്ങേറും. 30 ശിൽപശാലകൾ, 20 പാനൽ ചർച്ചകൾ, 5 പ്രഭാഷണങ്ങൾ, 5 സംഗീത പരിപാടികൾ അടക്കം 60 പരിപാടികൾ നടക്കും. 12 രാജ്യങ്ങളിലെ 71 പ്രമുഖരാണ് ഇതിന് നേതൃത്വം നൽകുക.