സഖാവ്

അന്യൻ പശിച്ചാൽ തൻ അന്നം പകുക്കുവാൻ

മുന്നിൽ വരുന്നവനാ സഖാവ്

അഷ്ടിയ്ക്കു മുട്ടുവരുത്തുന്നവൻ മുന്നിൽ

മുഷ്ടി ചുരുട്ടുന്നോനാ സഖാവ്

ചൂഷണം കണ്ടാൽ തിളയ്ക്കുന്ന ചോരയാൽ

വിപ്ലവം തീർക്കുന്നോനാ സഖാവ്

കണ്ണിൽ ജ്വലിക്കുന്നോരഗ്നിസ്ഫുലിംഗത്താൽ

കല്ലിനെപ്പോലും എരിയ്ക്കും സഖാവ്

എന്നും തെളിയ്ക്കുവാൻ തേരാളിയായ് നിന്ന്

ഏഴനെ തേരേറ്റുന്നോനാ സഖാവ്

രോദനം കേൾക്കുന്ന ദിക്കിലേയ്ക്കെത്തുവാൻ

രോഗം മറക്കുന്നോനാണാ സഖാവ്

നാടിന്റുയർച്ചയിൽ നഞ്ചു കലക്കാത്ത

നന്മതൻ രൂപമാണാ സഖാവ്

കാലത്തിനൊത്തു തൻ കോലം മിനുക്കുവാൻ

കാലണ നേടാത്തോനാണാ സഖാവ്

കാമ്പുള്ള ദർശനം കാട്ടുവാനെന്നും

നാമ്പുകൾ തേടുന്നോനാണാ സഖാവ്

കീശ വീർപ്പിയ്ക്കുവാൻ നാടുമുടിയ്ക്കുന്ന

കള്ളനായ് മാറില്ലൊരാ സഖാവ്

നെഞ്ചിൽ തുളയ്ക്കും കഠാരയിൽ തീരാത്ത

വിശ്വാസബിംബമാണാ സഖാവ്

ജാതിമതത്തിന്നതീതമായെന്നും

ജാതകം തീർക്കുന്നോനാണാ സഖാവ്

മാനവീയതയുൾക്കാഴ്ചയാക്കി

മാതൃക കാട്ടുന്നോനാണാ സഖാവ്

സോദര സ്നേഹത്തിൻ പാടമൊരുക്കുവാൻ

ചോര നീരാക്കുന്നോനാ സഖാവ് 

ചെങ്കൊടി മാത്രം പിടിയ്ക്കാനറിയുന്ന

വിപ്ലവവാദിയാണാ സഖാവ്

ദീനന്റെ കണ്ണീരു കയ്യാൽ തുടയ്ക്കുന്ന

ദൂതൻ്റെ ജന്മമാണാ സഖാവ്

ദാസനു തൻ ലാഭം വീതിച്ചു നൽകുന്ന

ദാനിപ്രതീകമാണാ സഖാവ്

തൂലികത്തുമ്പാലുയർത്തേണ്ട തിന്മകൾ

താലത്തിലേറ്റുന്നോനല്ലാ സഖാവ്

താടിയുള്ളപ്പനെപ്പേടിച്ചു പേടിച്ചു

താങ്ങിത്തളരുന്നോനല്ലാ സഖാവ്

താരകം കൈചൂണ്ടി നൽകുമെന്നോതീട്ടു

താരമായ് മാറുന്നോനല്ലാ സഖാവ്

ദേശരക്ഷയ്ക്കായ് തൻരക്തമേകുന്ന

ദേശീയവാദിയാണാ സഖാവ്

ദേശം വിഴുങ്ങാനണയുന്ന ശത്രുവിൻ

ദോഷം തിരിയുന്നോനാണാ സഖാവ്

ദേശക്കൊടിയിലെ ചോരക്കറ കണ്ട്

ദേശം മറക്കുന്നോനല്ലാ സഖാവ്

കൂട്ടത്തിലൊന്നിൻ്റെയാശയം മാറിയാൽ

കൂട്ടുമറക്കാത്തോൻ ആ സഖാവ്

ഊരുവിലക്കിൻ്റെ ശിക്ഷ വിധിയ്ക്കാത്ത

ഊരിൻ്റ സ്നേഹമാണാ സഖാവ്

രക്തദാഹിയായ് മാറാൻ കഴിയാത്ത

രക്ഷക രൂപനാണാസഖാവ് ശാന്തിമന്ത്രത്തിൻ്റെയർത്ഥമറിയുന്ന

പകമൂത്തുണരാത്തോനാ സഖാവ്

വിപ്ലവ ലക്ഷ്യങ്ങൾ നേടുവാനെത്രയോ

രക്തപ്പുഴകൾ നീന്തീ സഖാക്കൾ

എണ്ണിയാൽ തീരാത്ത രക്തസാക്ഷിത്വത്താൽ

എത്രയോ ചെങ്കൊടി തീർത്തൂ സഖാക്കൾ

ആദർശവഞ്ചിയിൽ കാപട്യമേറ്റാതെ

ആറിത്തണുക്കാത്ത വിപ്ലവം ചോരാതെ

ആരവം തീർക്കും സഖാക്കളെ നോക്കി

അവേശമോടൊത്തു ചൊല്ലണം ലാൽ സലാം.