യാത്ര
Mail This Article
ഒരു യാത്ര പോകേണമെനിക്ക്
ബന്ധബന്ധനങ്ങളില്ലാതെ
വേഷങ്ങളൂരിമാറ്റി ഒരജ്ഞാതയാത്ര
പിൻവിളി കേൾക്കാതെ
അസ്തമയത്തിനുമുൻപേ
പുറപ്പെടണം
കളകൂജനം കേട്ടുണരുന്ന പുലർകാലേ
മഞ്ഞുകണങ്ങൾ പുൽക്കൊടിയിൽ സ്ഫടികംപോൽ
മിന്നുന്നതു കാണാനൊരുയാത്ര
മരതകപ്പട്ടുലയുന്ന വയലേലകൾ
കാറ്റിൽ ചാഞ്ചാടുന്നതു കണ്ടൊരുയാത്ര
പുതുമഴ തൂവും മണ്ണിൻ സുഗന്ധം തേടുന്ന യാത്ര
ചെറുചൂടിൽ കട്ടനാറ്റിക്കുടിച്ച്
തുടങ്ങട്ടെ ഞാനെന്റെ യാത്ര
ഭൂമിതൻ ദാഹമകറ്റാൻ വന്ന മഴയുടെ
ചാരുത കാണാനാനാണീ യാത്ര
പെരുമഴനാദമുയരവേ ആനന്ദനൃത്തമാടി
ചിലങ്കമണികളിൽ ചിതറും മഴത്തുള്ളികൾ കാണണം
മഴയൊഴിഞ്ഞ വീഥികളിൽ ചെറുമരമുലുത്തി
പൊഴിയും മഴതുള്ളി നുണയണം
അമ്മതൻ മാറിലേലേക്കാണീ യാത്ര
അച്ഛന്റെ കരം പകരുമൊരുരുള കൊതിച്ചീ യാത്ര
ആദ്യസ്പർശമേറ്റ മണ്ണിൻ മടിത്തട്ടിലേക്കീ യാത്ര
ആശകൾ പേറിയീ യാത്ര
പൂർവികരുണ്ടവിടെയെനിക്കായ്
സ്വാഗതമോതുവാൻ
അനന്തതയിലവർതൻ
അരികിലേക്കാണെന്റെ
അന്ത്യയാത്ര!