ദശമെന്നാൽ പത്ത് 

പത്തെന്നാലിവ

പൂവാംകുരുന്നില

മുയൽച്ചെവി തത്ര ദുർവ്വ

കയ്യോന്നി  നിലപ്പന പിന്നെ

ആദരവാൽ വിഷ്ണുക്രാന്തി 

ചെറൂള തിരുതാളി

ഉഴിഞ്ഞ മുക്കുറ്റി

ഇവയല്ലോ ദശപുഷ്പങ്ങൾ

പാരിലിന്നറിയുന്നു

ഓരോന്നിനുമുണ്ടോരോ ദേവത 

വിധിയിലതു പറയുന്നു

അർച്ചിക്കാം ദേവതകൾക്ക് 

അർച്ചനാപുഷ്പമായി

ദശദേവപ്രീതിക്കായ്

അർപ്പിക്കാമെന്നുമെന്നും 

പൂവാംകുരുന്ന് ബ്രഹ്മന് 

കാമന്  മുയൽച്ചെവി

ദുർവ്വയാദിത്യന്  പിന്നെ

കയ്യോന്നി  ശിവനും 

നിലപ്പന ധരയാം ജനനിക്ക് 

ക്രാന്തി വിഷ്ണുവിനും

യമനു ചെറൂള 

ലക്ഷ്മിക്കായ് തിരുതാളി

ഇന്ദ്രനുഴിഞ്ഞ

മുക്കുറ്റി ശ്രീ പാർവ്വതിക്കും

അർച്ചിക്കാം ആദരവാൽ

ദശദേവപ്രീതിക്കായ്

ഗുണം പലതും വന്നീടും

ദശം ശതമായേറിടും

ദശരൂപനായി വന്ന ഭഗവാൻ

മേദിനീഭാരം തീർത്തപോൽ

ദശശതവ്യാധികളുടെ ഭാരം

നമ്മിൽനിന്നകറ്റും ഇവയെല്ലാം

തിരിച്ചറിയാം പകർന്നീടാം 

പാരിൽ നല്ലൊരു നാളേയ്ക്കായ് 

നട്ടുനനച്ചു പറിച്ചുകഴിക്കാം

കർക്കിടകക്കഞ്ഞിയായ് 

കർക്കിടാമൃതമായ്!