ഞാനൊരു 

ഓർമ്മച്ചിത്രമാവാൻ 

ഒരു പുതപ്പിനുള്ളിൽ 

മലർന്നുകിടക്കുന്നു

മന്ത്രാേച്ഛാരണങ്ങളുടെ

പുക മൂടിയ

വായുവിലേക്ക്

എൻ്റെ നെഞ്ചിൻ കൂട് തുറന്ന് 

ആയിരം 

ചിത്രശലഭങ്ങൾ പറക്കുന്നു .

പ്രിയപ്പെട്ടവർ ചിലർ

വേദഗ്രന്ഥമെന്നപോലെ 

ഈണത്തിൽ ,

അത്രയും മധുരമായി

"മസ്നവി "വായിക്കുന്നു ,

പരിസരം ലഹരികൊള്ളുന്നു,

റൂമിയുടെ ആത്മാവുമായുള്ള

സംഗമലയനത്തിൽ 

ചിലർ 

വെളുത്ത നീളൻ 

കുപ്പായവും ,നീളൻ തൊപ്പിയും 

ധരിച്ച് 

ചിത്തഭ്രമക്കാരൻ്റെ 

അബോധത്തിലെന്നപോൽ

കൈച്ചിറക് വിടർത്തി

വട്ടം ചുറ്റുന്നു ,

ചിലർ വണ്ടുകളായി 

മൂളുന്നു .

അപ്പോൾ 

പഞ്ഞിക്കെട്ടിൽ പൊതിഞ്ഞ

നിശ്ചലത 

ഏതൊ കാലത്തിൻ്റെ 

ആകാശം തൊടുന്നു .

നൂറ്റാണ്ടിൻ്റെ വംശീയ -

വൈര്യം പേറുന്ന 

അസർബൈജാൻ്റെയും 

അർമേനിയയുടേയും

അതിർത്തി സംഘർഷത്തിലെന്നപോൽ

വണ്ടുകളും ,പൂമ്പാറ്റകളും 

നിൻ്റെ

കൊട്ടാരത്തിനുപുറത്തെ

പൈൻമരച്ചോട്ടിൽ 

പൊടിക്കാറ്റിൽ

മണ്ണുമൂടി മരവിച്ചങ്ങനെ

കാലത്തെത്തൊടുന്ന 

ഈർപ്പത്തിൽ നിന്നും

ഒരു പനിനീർ മൊട്ട്

കിളിർക്കുന്നു .

ഒട്ടകം മണൽകുന്നുകൾ 

താണ്ടുന്നത് പോലെ

ആയാസപ്പെട്ട് 

വേച്ചു നടക്കുന്ന

മജ്നുവിൻ്റെ വ്യഥ പേറിയ

ക്ഷീണം 

ഈ പഞ്ഞിക്കെട്ടിനുള്ളിൽ 

പുഞ്ചിരിയായി

പിറന്നിരിക്കുന്നു .

സൂഫിയുടെ 

ചുണ്ടിലതു വിടർന്ന്  ,വിടർന്ന് 

നിഗൂഡമായ 

നിശബ്ദതയായി

പരിസരം രൂപപ്പെടുമ്പോൾ

താഴ്വരതാണ്ടിപ്പോവുന്ന

എൻ്റെ ജനാസ

അത്രയും 

അനായാസമെന്ന് 

ആളുകൾ

പരസ്പരം മന്ത്രിക്കും .

മട്ടുപ്പാവിലെ

കിളിവാതിൽപ്പാളികൾ 

തുറന്നുനോക്കുന്ന നിനക്കപ്പോൾ 

ഉറുമ്പുകൂട്ടങ്ങൾ 

ഒരു പൂവിതൾ 

ചുമന്ന് കോണ്ടുപോവുന്നതായി തോന്നും,

ഞാനത്ര മാത്രം

ശൂന്യനായിപ്പോയിരിക്കുന്നുവല്ലോ.