ഗാർലന്റിൽ സ്റ്റോർ ക്ലാർക്ക് വെടിയേറ്റു മരിച്ചു; ഈ വർഷം ഇതുവരെ ഗാർലന്റിൽ വെടിയേറ്റു മരിച്ചത് ഒൻപത് പേർ

ഗാർലന്റ് (ഡാലസ്)∙ ഡാലസ് ഗാർലന്റ് സിറ്റി വെസ്റ്റ് വാൽനട്ട് സ്ട്രീറ്റിലെ കൺവീനിയൻസ് സ്റ്റോർ ക്ലാർക്ക് കവർച്ചാ ശ്രമത്തിനിടെ വെടിയേറ്റു മരിച്ചു. മുഖം മറച്ചു തോക്കുമായെത്തിയ രണ്ടു പേരാണ് ഇയാൾക്ക് നേരെ വെടിയുതിർത്തത്. കവർച്ചാ ശ്രമത്തിനിടെയാണ് വെടിവയ്പ്. കടയിലെത്തിയ കസ്റ്റമറാണ് വെടിയേറ്റു കിടക്കുന്ന ഹെംഗ് ലാമി (30) നെ കുറിച്ചു പൊലീസിന് വിവരം നൽകിയത്. പോലീസെത്തുമ്പോൾ കൗണ്ടറിനു പുറകിൽ വെടിയേറ്റു കിടന്ന ലാമിനെ ഉടനെ ആശുപത്രിയിൽ എത്തിച്ചുവെങ്കിലും മരണം സംഭവിക്കുകയായിരുന്നു.

സ്റ്റോറിലെ ക്യാമറയിൽ അക്രമികളുടെ ചിത്രം പൊലീസ് കണ്ടെത്തി. എന്നാൽ രക്ഷപ്പെട്ട പ്രതികളെ കണ്ടെത്താൻ പോലീസിനായിട്ടില്ല. ഇവരെ കുറിച്ചു വിവരം നൽകുന്നവർക്കു 5,000 ഡോളർ പൊലീസ് പ്രതിഫലം പ്രഖ്യാപിച്ചിട്ടുണ്ട്. 972 272 8477 എന്ന നമ്പറിൽ ഗാർലന്റ് പൊലീസിനെ വിവരം അറിയിക്കണമെന്നും അഭ്യർഥിച്ചു.

ഈ വർഷം കൺവീനിയൻസ് സ്റ്റോറിൽ (ഗാർലന്റിൽ മാത്രം) നടക്കുന്ന ഒൻപതാമത്തെ വെടിവയ്പു സംഭവമാണിത്. മരിച്ചവരിൽ ഇന്ത്യൻ വംശജനും ഉൾപ്പെടുന്നു.