ഫോമാ കേരള കൺവൻഷൻ മേയ് 13  മുതൽ തിരുവനന്തപുരത്ത്

ഫോമയുടെ ഏഴാമത് കേരള കൺവൻഷൻ, മേയ് 13-14 തീയതികളിൽ തിരുവനന്തപുരത്ത് മസ്കറ്റ് ഹോട്ടലിൽ നടക്കും. മുഖ്യമന്ത്രി പിണറായി വിജയൻ കൺവൻഷൻ ഉദ്ഘാടനം ചെയ്യും, പ്രതിപക്ഷ നേതാവ് വി.ഡി.സതീശൻ, പ്രമുഖ എഴുത്തുകാരനും എംപിയുമായ ശശി തരൂർ, മുൻ വിദ്യാഭ്യാസ മന്ത്രി എം.എ ബേബി, മുൻ മിസോറാം ഗവർണർ കുമ്മനം രാജശേഖരൻ, പ്രമുഖ മാധ്യമ പ്രവർത്തകനും എംപിയുമായ ജോൺ ബ്രിട്ടാസ്, എം.പി.പ്രേമചന്ദ്രൻ,  മുൻമന്ത്രിയും നടനും എംഎൽഎയുമായ കെ.ബി.ഗണേഷ് കുമാർ, എംഎൽഎ പ്രതിഭാ ഹരി, മുൻ എംഎൽഎ രാജു എബ്രഹാം, പ്രമുഖ സാമൂഹ്യ പ്രവർത്തകയും സുപ്രീം കോടതി അഭിഭാഷകയുമായ സിസ്റ്റർ ജെസി കുര്യൻ എന്നിവർ പങ്കെടുക്കും.

ഫോമാ വനിതാ ഫോറം നിർധനരായ  വിദ്യാർഥിനികൾക്ക് നൽകുന്ന സ്‌കോളർഷിപ്പ് ചടങ്ങിൽ കേരളാ വിദ്യാഭ്യാസ വകുപ്പു മന്ത്രി വി.ശിവൻകുട്ടി  നൽകും. നിർധനരും സമർഥരുമായ നഴ്‌സിങ് മറ്റു സാങ്കേതിക മേഖലകളിൽ പഠിക്കുന്ന വിദ്യാർഥിനികൾ എന്നിവരെ അപേക്ഷ ക്ഷണിച്ചു സൂക്ഷ്മ പരിശോധനയിലൂടെ കണ്ടെത്തിയ 40 പേർക്കാണു ആദ്യ ഘട്ടത്തിൽ സ്‌കോളർഷിപ്പ് നൽകുക.

മറ്റുള്ള വിദ്യാർഥികൾക്ക് പിന്നീട് നൽകും. കൂടാതെ വിവിധങ്ങളായ വിഷയങ്ങളെ അധികരിച്ചുള്ള സെമിനാറുകൾ, ചർച്ചകൾ തുടങ്ങിയവ സമ്മേളനത്തിന്റെ ഭാഗമായി സംഘടിപ്പിച്ചിട്ടുണ്ട്. വനിതാശാക്തീകരണവും, കുടുംബ മൂല്യങ്ങളെയും, കുറിച്ച് അഭിഭാഷക സിസ്റ്റർ ജെസി കുര്യൻ പ്രഭാഷണം നടത്തും.

മേയ് 14ന്, കൊല്ലത്തു നടക്കുന്ന ഭക്ഷ്യ വിരുന്നിൽ കൊല്ലം മേയർ പ്രസന്ന ഏണസ്‌റ്റ് മന്ത്രി  ചിഞ്ചുറാണി, എംപി.പ്രേമചന്ദ്രൻ, പി.സി.വിഷ്ണുനാഥ് എംഎൽഎ, കെ.ബി.ഗണേഷ് കുമാർ എംഎൽഎ , പ്രതിഭാ ഹരി എംഎൽഎ തുടങ്ങിയവരും, മറ്റു സാമൂഹ്യ-സാംസ്കാരിക പ്രവർത്തകരും പങ്കെടുക്കും. കൺവൻഷനിൽ പങ്കെടുക്കുന്നതിന് അമേരിക്കയിൽ നിന്നുള്ള ഫോമയുടെയും അംഗസംഘടനകളുടെയും  പ്രമുഖരും  സജീവ പ്രവർത്തകരും കേരളത്തിൽ എത്തിച്ചേരും. 

സമ്മേളനത്തോടനുബന്ധിച്ചു എത്തിച്ചേരുന്ന പ്രതിനിധികൾക്കായി കൊല്ലത്ത് ബോട്ടു സവാരിയും ഒരുക്കിയിട്ടുണ്ട്. കേരളാ കൺവൻഷന്റെ വിജയത്തിനായി വിപുലമായ ഒരുക്കങ്ങളാണ് ചെയ്തുകൊണ്ടിരിക്കുന്നതെന്നു കൺവൻഷൻ ചെയർമാൻ ഡോക്ടർ ജേക്കബ് തോമസ് അറിയിച്ചു. ഫോമയുടെ ചരിത്രത്തിലെ ഏറ്റവും മികച്ച കേരള കൺവൻഷനുള്ള തയാറെടുപ്പാണ് നടക്കുന്നതെന്നും എല്ലാവരും സഹകരിക്കണമെന്നും അദേഹം പറഞ്ഞു.

കേരളത്തിൽ നടക്കുന്ന ഏഴാമത് കൺവൻഷന്റെ സുഗമമായ നടത്തിപ്പിനും വിജയത്തിനും എല്ലാ അംഗങ്ങളുടെയും സഹായ സഹകരണങ്ങളും, പങ്കാളിത്തവും ഉണ്ടാകണമെന്നു ഫോമാ പ്രസിഡന്റ് അനിയൻ ജോർജ്, ജനറൽ സെക്രട്ടറി ടി. ഉണ്ണികൃഷ്ണൻ, ട്രഷറർ തോമസ്.ടി.ഉമ്മൻ, വൈസ് പ്രസിഡന്റ് പ്രദീപ് നായർ, ജോയിന്റ് സെക്രട്ടറി ജോസ് മണക്കാട്ട്, ജോയിന്റ് ട്രഷറർ ബിജു തോണിക്കടവിൽ എന്നിവർ അഭ്യർഥിച്ചു.