സെനറ്റ് ചരിത്രത്തിൽ കൂടുതൽ ടൈബ്രേക്കിങ് വോട്ടുകൾ ചെയ്ത റെക്കോർഡ് കമലാ ഹാരിസിന്
Mail This Article
വാഷിങ്ടൻ ഡിസി ∙ സെനറ്റ് ചരിത്രത്തിലെ ഏറ്റവും കൂടുതൽ ടൈബ്രേക്കിങ് വോട്ടുകൾ ചെയ്ത വൈസ് പ്രസിഡന്റ് എന്ന റെക്കോർഡ് കമലാ ഹാരിസിന് സ്വന്തം. ഇടക്കാല തിരഞ്ഞെടുപ്പിന് ശേഷം ഡമോക്രാറ്റുകൾ തങ്ങളുടെ ഭൂരിപക്ഷം 50ൽ നിന്ന് 51 ആയി ഉയർത്തിയപ്പോൾ ഹാരിസിന് ആ റോളിൽ നിന്ന് ഇളവ് ലഭിക്കുമെന്ന് പ്രതീക്ഷിച്ചിരുന്നു. എന്നാൽ പെൻസിൽവേനിയയിൽ നിന്ന് പുതുതായി തിരഞ്ഞെടുക്കപ്പെട്ട ഡമോക്രാറ്റായ സെനറ്റർ ജോൺ ഫെറ്റർമാനും, സെനറ്റർ ഡയാന ഫെയിൻസ്റ്റൈയും വോട്ടെടുപ്പിൽ എത്താതിരുന്നതിനാലാണ് ടൈബ്രേക്കിങ് വോട്ട് ആവശ്യമായി വന്നത്. ഇരുവരും ആശുപത്രിയിൽ ചികിത്സയിലാണ്.
കമലാ ഹാരിസ് 31-ാമത്തെ ടൈബ്രേക്കിങ് വോട്ടാണ് രേഖപ്പെടുത്തിയത്. 1825 മുതൽ 1832 വരെ വൈസ് പ്രസിഡന്റായിരുന്ന ജോൺ സി കാൽഹൗണിന്റെ പേരിലായിരുന്നു ഇത്രയും നാൾ ഈ റെക്കോർഡ്. എട്ടു വര്ഷം വൈസ് പ്രസിഡന്റായിരുന്ന ജോൺ സി കാല്ഹൂണില് നിന്ന് വ്യത്യസ്തമായി, ഹാരിസ് രണ്ടര വര്ഷം കൊണ്ടാണ് റെക്കോര്ഡ് സ്ഥാപിച്ചത്.
'ഇത് ഒരു നിമിഷമാണ്, ഇനിയും ഒരുപാട് കാര്യങ്ങൾ ചെയ്യാനുണ്ടെന്ന് ഞാൻ കരുതുന്നു' ഹാരിസ് മാധ്യമപ്രവർത്തകരോട് പറഞ്ഞു.
English Summary: Vice President Kamala Harris matches record for tiebreaking votes in Senate