റിപ്പബ്ലിക്കൻ എതിർപ്പ് മറികടന്നു; വിവിധ രാജ്യങ്ങൾക്കുള്ള സുരക്ഷാ സഹായം പാക്കേജ് യുഎസ് ജനപ്രതിനിധി പാസാക്കി

വാഷിങ്‌ടൻ∙ റിപ്പബ്ലിക്കൻ പാർട്ടിയുടെ കടുത്ത എതിർപ്പിനെ അതിജീവിച്ച് യുക്രെയ്ൻ, ഇസ്രയേൽ, തായ്‌വാൻ എന്നീ രാജ്യങ്ങൾക്ക് 95 ബില്യൻ ഡോളർ സുരക്ഷാ സഹായം നൽകുന്ന നിയമനിർമാണ പാക്കേജ്  യുഎസ് ജനപ്രതിനിധി സഭ വിശാലമായ ഉഭയകക്ഷി പിന്തുണയോടെ പാസാക്കി. ഇനി ഈ നിയമനിർമാണം ഡെമോക്രാറ്റിക് ഭൂരിപക്ഷമുള്ള സെനറ്റിലേക്ക് അയക്കും. 311-112 എന്ന നിലയിലാണ് വോട്ടെടുപ്പിൽ യുക്രെയ്‌നുള്ള ഫണ്ടിങ് പാസാക്കപ്പെട്ടത്. 112 റിപ്പബ്ലിക്കൻമാർ നിയമനിർമാണത്തെ എതിർത്തു.

ഡെമോക്രാറ്റിക് പ്രസിഡന്‍റ് ജോ ബൈഡൻ മുതൽ ഉന്നത സെനറ്റ് റിപ്പബ്ലിക്കൻ മിച്ച് മക്കോണൽ വരെയുള്ള യുഎസ് നേതാക്കൾ റിപ്പബ്ലിക്കൻ ഹൗസ് സ്പീക്കർ മൈക്ക് ജോൺസണോട് ഈ ബിൽ വോട്ടിനായി കൊണ്ടുവരാൻ അഭ്യർഥിച്ചിരുന്നു. ചൊവ്വാഴ്ച ഉച്ചയോടെ ചില പ്രാഥമിക വോട്ടുകളോടെ ബിൽ സെനറ്റ് പരിഗണിക്കാൻ തയ്യാറാകുമെന്ന് കരുതപ്പെടുന്നു. അടുത്ത ആഴ്ച എപ്പോഴെങ്കിലും അന്തിമ വോട്ടെടുപ്പ് നടക്കുമെന്നാണ് പ്രതീക്ഷ. നിയമനിർമാണ പാക്കേജ്  പാസായാൽ  ബൈഡൻ ഒപ്പിടുന്നതോടെ അത് നടപ്പിൽ വരും.