മതം ഉപേക്ഷിച്ച നെതർലൻഡ്സ്
![netherlands-without-religion Photo Credit: Rawf8 / istockphotos.com](https://img-mm.manoramaonline.com/content/dam/mm/mo/global-malayali/us/images/2024/5/15/netherland.jpg?w=1120&h=583)
Mail This Article
വിശുദ്ധവാരം ആചരിക്കുന്ന ദിവസങ്ങളിലാണ് ആംസ്റ്റർഡാമിൽ ചെന്നത്. അടുത്ത പള്ളി വല്ലതും ഉണ്ടെങ്കിൽ ഒന്നു കുരിശുവരക്കാനെങ്കിലും അവിടെ ഒന്ന് കയറാം എന്ന് മനസ്സിൽ ആഗ്രഹിച്ചിരുന്നു. എന്നാൽ വളരെ നടന്നപ്പോൾ ഒരു പഴയപള്ളിയാണ് കണ്ടത്, അവിടെ കയറാം എന്ന് കരുതിയപ്പോൾ അത് അടച്ചിരിക്കുകയാണ്, നേരത്തെ അറിയിച്ചാലേ അവിടെ കയറാൻ സാധിക്കൂ എന്ന് അറിഞ്ഞു. അമേരിക്കയിൽ തലങ്ങും വിലങ്ങും പള്ളികളുടെ ഇടയിൽനിന്നും എത്തി, മതമില്ലാത്ത ഒരു സമൂഹത്തിലെ ചുറ്റുപാടുകൾ പുതുമയായി.
കൂടെയുണ്ടായിരുന്ന ഡാനിഷ് സുഹൃത്തിനോട് അതേപ്പറ്റി ചോദിച്ചപ്പോൾ നിസ്സംഗമായ മറുപടി, അവർക്കു അതു പറയുന്നതുതന്നെ താല്പര്യമില്ല എന്നുമനസ്സിലായി. രാഷ്ട്രീയത്തിലും വിദ്യാഭ്യാസത്തിലും മതത്തിന് കാര്യമായ പങ്കില്ലെന്ന് പല ഡച്ചുകാരും വിശ്വസിക്കുന്നു. പൊതുസമൂഹത്തിൽ ചർച്ച ചെയ്യാൻ പാടില്ലാത്ത ഒരു വ്യക്തിപരമായ കാര്യമായാണ് മതം ഇവിടെ പ്രാഥമികമായി പരിഗണിക്കപ്പെടുന്നത്.
നെതർലാൻഡിലെ ക്രിസ്തുമതത്തിന് സമ്പന്നവും സങ്കീർണ്ണവുമായ ഒരു ചരിത്രമുണ്ട്. വൈവിധ്യമാർന്ന ക്രിസ്ത്യൻ വിഭാഗങ്ങളുടെ ആസ്ഥാനമാണ് രാജ്യം,റോമൻ കത്തോലിക്ക (18 %), പ്രൊട്ടസ്റ്റൻ്റ് വിഭാഗം (14 %), ഇസ്ലാം (5 %), മറ്റുള്ളവർ (6 %) എന്നാൽ ഏറ്റവും കൂടുതൽ ആളുകൾ മതേതരരായിട്ടാണ് അടയാളപ്പെടുത്തുന്നത്. മതേതരവൽക്കരണ പ്രവണതയ്ക്ക് കാരണമായത് വിദ്യാഭ്യാസവും ശാസ്ത്രീയ അറിവും, സാമൂഹികവും സാംസ്കാരികവുമായ മാറ്റങ്ങൾ, വ്യക്തിത്വത്തിന്റെ ഉയർച്ച എന്നിവയുൾപ്പെടെ വിവിധ ഘടകങ്ങളാണ്. കൂടാതെ, പല യുവതലമുറകളും പരമ്പരാഗത മതസ്ഥാപനങ്ങളുമായി താദാത്മ്യം പ്രാപിക്കാനുള്ള സാധ്യത കുറവാണ്, മാത്രമല്ല ആത്മീയതയുള്ളവരാണെങ്കിലും മതപരമല്ല. 16-ഉം 17-ഉം നൂറ്റാണ്ടുകളിൽ, ഡച്ച് റിപ്പബ്ലിക്ക് മതപരമായ സഹിഷ്ണുതയുടെ ഉയർന്ന മൂല്യനിർണ്ണയത്തിന് പേരുകേട്ടതാണ്, അത് ഇപ്പോഴും ദേശീയ അഭിമാനത്തിന്റെ ഭാഗമായി ഈ ജനത കണക്കാക്കുന്നു.
എന്നാൽ തീവ്രമായ മതബോധത്തിന്റെ പിൻബലത്തിലാണ് ആധുനിക ഡച്ച് സമൂഹം രൂപപ്പെട്ടത്. ഡച്ചുകാരുടെ ഇടയിൽ ലൂഥറനിസത്തിന് കാര്യമായ പിന്തുണ ലഭിച്ചില്ല, എന്നാൽ പതിറ്റാണ്ടുകൾക്ക് ശേഷം അവതരിപ്പിച്ച കാൽവിനിസം അത് നേടി. കാൽവിനിസ്റ്റ് ഡച്ചുകാരെ കത്തോലിക്കാ സ്പെയിൻകാരിൽ നിന്ന് മോചിപ്പിക്കാൻ എൺപതു വർഷത്തെ യുദ്ധം നടത്തിയ ചരിത്രവും ഡച്ചുകാർക്കുണ്ട്. ചരിത്രത്തിൽ എന്നും ഡച്ചുകാർക്കു ഏതു വിശ്വാസത്തിലും അവരുടേതായ തനതായ കാഴ്ചപ്പാടുകളും ചിന്താഗതികളും ഉണ്ടായിട്ടുണ്ട്.
ഡച്ചു കാൽവിനിസ്റ്റുകളുടെ ജീവിതരീതികൾ വ്യത്യസ്തമാണ്. അതായിരിക്കാം അവരുടെ മധ്യകാലത്തെ മുന്നേറ്റങ്ങളുടെ അടിസ്ഥാന കാരണങ്ങളും. പ്രൊട്ടസ്റ്റൻ്റ് നവീകരണകാലത്ത് ജനീവയിലെ ഒരു ഫ്രഞ്ച് ദൈവശാസ്ത്രജ്ഞനും പാസ്റ്ററും പരിഷ്കർത്താവുമായിരുന്നു ജോൺ കാൽവിൻ. കത്തോലിക്കാ വിശ്വാസമുള്ള ഒരു കുടുംബത്തിൽ ജനിച്ചെങ്കിലും, തത്ത്വചിന്ത, മാനവികത, നിയമം എന്നിവ പഠിച്ചതിന് ശേഷം 1533-ൽ അദ്ദേഹം പ്രൊട്ടസ്റ്റന്റ് മതത്തിലേക്ക് പരിവർത്തനം ചെയ്തു. അദ്ദേഹം ഡച്ചുകാരനായിരുന്നില്ല എങ്കിലും ഡച്ചുകാർ അദ്ദേഹത്തെ നെഞ്ചിലേറ്റി. ബഹുമാനം, സ്വീകാര്യത, അച്ചടക്കം, കാര്യക്ഷമത എന്നിവയിൽ അധിഷ്ഠിതമായ ഒരു സമൂഹം കെട്ടിപ്പടുക്കാൻ ഡച്ചുകാർക്ക് കഴിഞ്ഞു.
കഠിനാധ്വാനം വിലമതിക്കുന്ന, നീതി നടപ്പാക്കാൻ കഴിയുന്ന, കഴിവുകൾ പരിപോഷിപ്പിക്കുന്ന നാടാണിത്. നിങ്ങൾ ഒരു ഡച്ച് വ്യക്തിക്ക് പണം കടം കൊടുക്കുകയാണെങ്കിൽ, അവർ സാധാരണഗതിയിൽ ഉടൻ തന്നെ നിങ്ങൾക്ക് തിരികെ നൽകും. പണം കിട്ടിയില്ലെങ്കിൽ നിങ്ങൾ തകർന്നുപോകും എന്നുകൊണ്ടല്ല, അവർ ഉറച്ചു വിശ്വസിക്കുന്ന വാക്കിന്റെ നേരാണ് അവരുടെ പ്രമാണം. അത് അവർ തിരിച്ചു പ്രതീക്ഷിക്കുന്നുമുണ്ട്. അത് അവർ ഉറപ്പാക്കുകയും ചെയ്യും.
ജോലിസ്ഥലത്തെ കഠിനാധ്വാനം, കൃത്യനിഷ്ഠ, പ്രഫഷനലിസം എന്നിവയെ ഡച്ച് ജനത വിലമതിക്കുന്നു. മുകളിൽനിന്നും നിർദേശം അനുസരിച്ചു മാത്രം ജോലിചെയ്യുന്ന ശ്രേണീബദ്ധമായ സംവിധാനമില്ല നെതർലാൻഡിലെ ബിസിനസ്സുകൾക്ക്. അതുകൊണ്ടു തീരുമാനമെടുക്കൽ സഹകരണത്തിനും ടീം വർക്കിനും കൂടുതൽ ഊന്നൽ നൽകുന്നു, ഡച്ച് ജീവനക്കാർക്ക് പൊതുവെ ഉയർന്ന സ്വയംഭരണവും സ്വാതന്ത്ര്യവും ഉണ്ട്.
അവരുടെ ഉന്നതമായ തൊഴിൽ നൈതികത കൊണ്ടാവാം കേവലം 17 മില്യൻ ജനങ്ങളുള്ള ഒരു രാജ്യത്തിനു ലോകത്തിനു കൊടുക്കാനായത് മികച്ച സംഭാവനകളാണ്. ദൂരദർശിനിയും മൈക്രോസ്കോപ്പും, ഓഹരി വിപണി, കാസറ്റ്, സിഡി, ഡിവിഡി, ബ്ലൂ-റേ, ബ്ലൂടൂത്ത്, അന്തർവാഹിനി, സ്പീഡ് ക്യാമറ, ഫോർ വീൽ ഡ്രൈവ് എന്നുതുടങ്ങി എത്രയെത്ര സംഭവങ്ങൾ.
നെതർലാൻഡ്സ് ലോകത്തിലെ ഏറ്റവും ലിബറൽ രാഷ്ട്രങ്ങളിലൊന്നാണ്, എന്നിട്ടും അവരെ പൊതുവെ വിശേഷിപ്പിക്കുന്നത് ശാന്തശീലരും സംരക്ഷിതരും നിയമങ്ങളാൽ നയിക്കപ്പെടുന്നവരും നന്നായി അച്ചടക്കമുള്ളവരുമെന്നാണ്. നെതർലാൻഡിലെ കാൽവിനിസം പഴയതുപോലെ മതവിശ്വാസങ്ങളുമായി ബന്ധിപ്പിച്ചിട്ടില്ല, എന്നിരുന്നാലും കാൽവിനിസം ഡച്ചുകാരുടെ ജീവിതരീതിയായി വികസിച്ചു.
യൂറോപ്പിൽ മതസഹിഷ്ണുതയുടെ പേരിൽ നെതർലാൻഡ്സ് അറിയപ്പെട്ടിരുന്നു. അത് പീഡിപ്പിക്കപ്പെട്ടവർക്ക് ഒരു അഭയസ്ഥാനവും കുടിയേറ്റക്കാരിൽ പലർക്കും ഒരു ഭവനവും ആയിത്തീർന്നു. ഇംഗ്ലണ്ടിൽ നിന്നുള്ള അഭയാർഥികൾക്ക് നെതർലാൻഡ്സ് ഇടത്താവളമായി. എന്നാൽ ഓരോ സമൂഹങ്ങളും അവരവർ നിലയുറപ്പിച്ച ഇടങ്ങളിൽ സ്വതന്ത്രമായ ഭരണവും ജീവിതക്രമങ്ങളും ഉറപ്പാക്കി. ഇങ്ങനെ സാമൂഹിക അകലം വർദ്ധിച്ചു. ഇതിനു പില്ലറൈസേഷൻ എന്നാണ് പറയപ്പെട്ടിരുന്നത്. മതത്തിന്റെയും അനുബന്ധ രാഷ്ട്രീയ വിശ്വാസങ്ങളുടെയും അടിസ്ഥാനത്തിൽ പൗരന്മാരെ ഗ്രൂപ്പുകളായി വേർതിരിക്കുന്നതാണ് ഈ സംവിധാനം. ഓരോ പില്ലറിനും അതിന്റേതായ സാമൂഹിക സ്ഥാപനങ്ങളും സാമൂഹിക സംഘടനകളും ഉണ്ടായിരിക്കാം. സ്വന്തം പത്രങ്ങൾ, പ്രക്ഷേപണ സംഘടനകൾ, രാഷ്ട്രീയ പാർട്ടികൾ, ട്രേഡ് യൂണിയനുകൾ, കർഷക സംഘടനകൾ, ബാങ്കുകൾ, സ്റ്റോറുകൾ, സ്കൂളുകൾ, ആശുപത്രികൾ, സർവകലാശാലകൾ, സ്കൗട്ടിംഗ് സംഘടനകൾ, സ്പോർട്സ് ക്ലബുകൾ എന്നിവ ഇതിൽ ഉൾപ്പെട്ടേക്കാം.
ഏതാണ്ട് 1880 മുതൽ നെതർലാൻഡ് മതരഹിത സമൂഹമായി മാറാൻതുടങ്ങിയിരുന്നു. രണ്ടാം ലോക മഹായുദ്ധത്തിനുശേഷം പ്രധാന മതങ്ങൾ ക്ഷയിച്ചു തുടങ്ങി. 1960 കൾക്കും 1980 കൾക്കും ഇടയിൽ ഡച്ച് രാഷ്ട്രീയത്തിൽ മതത്തിന് അതിന്റെ സ്വാധീനം നഷ്ടപ്പെട്ടു. ഇരുപതാം നൂറ്റാണ്ടിന്റെ അവസാനത്തിൽ, അവരുടെ സമൂഹത്തിലെ മാറ്റങ്ങൾക്ക് അനുസൃതമായി മയക്കുമരുന്ന് ഉപയോഗം, ദയാവധം, സ്വവർഗരതി എന്നിവയെക്കുറിച്ചുള്ള അവരുടെ നയങ്ങൾ ഉദാരവൽക്കരിച്ചു. ഇക്കാലയിളവിൽ കുടിയേറ്റം മൂലം മുസ്ലിം മതവിശ്വാസികളുടെ എണ്ണം 0% ൽ നിന്ന് 5% ആയി ഉയർന്നു.
21-ാം നൂറ്റാണ്ടിൽ, ഡച്ച് ജനസംഖ്യയുടെ വലിയൊരു ഭാഗം, സഭയെയും ഭരണകൂടത്തെയും വേർതിരിക്കുന്നതിൽ വിശ്വസിക്കുന്നു, അതായത്, രാഷ്ട്രീയത്തിലോ പൊതുവിദ്യാഭ്യാസത്തിലോ മതം നിർണായക പങ്ക് വഹിക്കരുത്. മതം ഒരു സാമൂഹിക ബന്ധനമായി കാണപ്പെടുന്നു. നെതർലൻഡിലെ മതം പൊതുവെ വ്യക്തിപരമായ കാര്യമായി കണക്കാക്കപ്പെടുന്നു, അത് പൊതുസ്ഥലത്ത് പ്രചരിപ്പിക്കാൻ പാടില്ല. ഓരോരുത്തർക്കും അവരവരുടെ മതപരമോ ആശയപരമോ ആയ തിരഞ്ഞെടുപ്പുകൾ നടത്താനുള്ള അവകാശം ഉണ്ടായിരിക്കണം. മറ്റൊരു മതത്തിലേക്ക് പരിവർത്തനം ചെയ്യാനും വിശ്വസിക്കാതിരിക്കാനും ഉള്ള തിരഞ്ഞെടുപ്പും ഇതിൽ ഉൾപ്പെടുന്നു. നെതർലാൻഡ്സിന് വ്യത്യസ്ത മതങ്ങളും വിശ്വാസങ്ങളും തമ്മിൽ യാതൊരു വ്യത്യാസവുമില്ല.