ഇതാണോ ലോകത്തിലെ ഏറ്റവും ചെറിയ ഹോട്ടൽ? ആകെ 50 സ്ക്വയർഫീറ്റ്, ഒരു കിടപ്പുമുറി!

എസ്റ്റോണിയയിലെ  വോർ എന്ന സ്ഥലത്താണ് ഈ കുഞ്ഞൻ ഹോട്ടൽ സ്ഥിതി ചെയ്യുന്നത്. പുറമെ കാണുമ്പോൾ കുഞ്ഞനാണെങ്കിലും  50 ചതുരശ്രയടിയിൽ മൂന്നു നിലകളിലായി ഒരു  കിടപ്പുമുറി, ബാത്‌റൂം,  ഓഫിസ് സ്‌പേസ്, ചെറിയ കിച്ചൻ, സ്റ്റെയർ, ഓപ്പൺ ടെറസ് എന്നിവ ഉൾക്കൊള്ളിച്ചിരിക്കുന്നു. രണ്ടു പേർക്കുമാത്രമാണ് ഈ ഹോട്ടലിൽ ഒരേസമയം താമസിക്കാനാവുക.

മൂന്നു നിലകളെയും ബന്ധിപ്പിച്ചു കൊണ്ടുള്ള ഗോവണി ഒരു കൗതുകകാഴ്ച്ചയാണ്. ആദ്യം എത്തുന്നത് ഓഫിസ് സ്‌പേസിലേക്കാണ്. ഇവിടെ നിന്നും സ്റ്റെയർ വഴി കിടപ്പുമുറിയിലേക്കെത്താം. കിടപ്പുമുറി കുഞ്ഞൻ ആണെങ്കിലും സൗകര്യത്തിൽ പിന്നിലല്ല. 

ഇവിടെ നിന്നും ഓപ്പൺ ടെറസിലേക്ക് കയറാം. ഇവിടെ ഇരിപ്പിടങ്ങൾ നൽകിയിട്ടുണ്ട്. പുറത്തെ കാഴ്ചകളും സൂര്യാസ്തമനവുമൊക്കെ ഇവിടെ ഇരുന്നാസ്വദിക്കാം. ടോണിസ് ഓർഗ് എന്ന വ്യക്തിയാണ് ഈ ഹോട്ടൽ ഡിസൈൻ ചെയ്തത്.

വെറും 6000 രൂപ മാത്രമാണ് ഒരു രാത്രി ഇവിടെ താങ്ങാനുള്ള ചെലവ്. ലോകത്തിലെ ഏറ്റവും ചെറിയ ഹോട്ടലുകളിൽ ഒന്നായ ഇവിടെ താമസിക്കാൻ കപ്പിൾസും സോളോ യാത്രികരും മാസങ്ങൾക്ക് മുന്നേ ബുക്ക് ചെയ്തു കാത്തിരിക്കുകയാണ്.

English Summary- Smallest Hotel In the World